Сцяг Аўторак, 16 ліпеня 2024
Усе навіны
Усе навіны
Грамадства
13 лютага 2024, 19:03

"Работа з моладдзю для нас асноватворная". Качанава сустрэлася з навучэнцамі гімназіі нумар 13 Мінска 

13 лютага, Мінск /Кар. БЕЛТА/. Старшыня Савета Рэспублікі Наталля Качанава правяла сустрэчу з навучэнцамі гімназіі нумар 13 Мінска, перадае карэспандэнт БЕЛТА.

Навучэнцы ў час размовы з Наталляй Качанавай цікавіліся рознымі пытаннямі. Размова ішла ў тым ліку аб рабоце Савета Рэспублікі, маладзёжнай палітыцы і маладзёжных ініцыятывах, лічбавай гігіене, выбары прафесіі, Маладзёжным савеце пры Нацыянальным сходзе і многім іншым.

"Мы вельмі шмат працуем з моладдзю. Сёння кіраўнік дзяржавы правёў нараду з членамі Рэспубліканскага савета рэктараў ВНУ. Хацелася б даведацца ваша меркаванне па пытаннях, якія там узнімаліся. Напрыклад, аб уступнай кампаніі, падагульняючых экзаменах. Работа з моладдзю для нас асноватворная", - звярнулася да навучэнцаў Наталля Качанава.

Старшыня Савета Рэспублікі нагадала, што ў 2020 годзе ў Беларусі быў створаны Маладзёжны савет (парламент) пры Нацыянальным сходзе, дзе прадстаўлены самыя шырокія слаі беларускай моладзі: "Спачатку ў Маладзёжны савет уваходзілі па 10 прадстаўнікоў ад кожнай вобласці і Мінска - усяго 70 чалавек. Цяпер яго склад значна пашыраны". Акрамя таго, падкрэсліла Наталля Качанава, каля 50 законаў рэгламентуюць маладзёжную палітыку ў Беларусі.

Старшыня Савета Рэспублікі таксама звярнула ўвагу на вялікую колькасць недакладнай інфармацыі ў інтэрнэце і неабходнасць захавання лічбавай гігіены. "Трэба вучыцца адрозніваць праўдзівую інфармацыю ад недакладнай. Менавіта таму трэба сустракацца з людзьмі, даносіць да іх аб'ектыўную інфармацыю, расказваць, да чаго мы імкнёмся і чаго хочам дасягнуць", - лічыць спікер.

Адзін з навучэнцаў задаў Наталлі Качанавай пытанне аб людзях, якія з’яўляюцца для яе прыкладам. "Калі я вучылася ў школе, для мяне і маіх равеснікаў прыкладам былі настаўнікі, многія з якіх прайшлі Вялікую Айчынную вайну. Мяне натхнялі бацькі. Магу сказаць, што я ніколі не магла зрабіць так, каб засмуціць іх. Гэтым я кіруюся і цяпер. Прыкладам для мяне быў і старэйшы брат, які паступіў у ваеннае вучылішча. У цэлым магу сказаць, што на кожным жыццёвым этапе цябе нехта фарміруе. А калі я амаль дзесяць гадоў таму прыехала ў Мінск і стала працаваць з Прэзідэнтам, ён стаў для мяне сапраўдным прыкладам беззапаветнай адданасці сваёй краіне, стойкасці і сапраўднай любові да народа", - адзначыла Наталля Качанава.

Дзеці пацікавіліся, якія важныя маладзёжныя ініцыятывы можа адзначыць Наталля Качанава. Старшыня Савета Рэспублікі назвала такія ініцыятывы, як "Поезд Памяці" і "Дзеці Садружнасці". "Я спадзяюся, што ў 2025 годзе мы прымем "Дзеці Садружнасці" ў сябе, калі ўдзельнікі з іншых краін прыедуць да нас, а мы арганізуем для іх мерапрыемствы, пакажам нашу краіну. Галоўнае - праводзіць такія мерапрыемствы без фармалізму. А яшчэ я вельмі люблю нашу ініцыятыву "Поезд Памяці", якую мы паспяхова рэалізоўваем", - падкрэсліла Наталля Качанава.

Навучэнка дзясятага класа пацікавілася, якая ідэя, на думку Наталлі Качанавай, з'яўляецца аб'яднальнай для беларусаў. "Я лічу, што фундаментам з'яўляецца наша слаўная гісторыя. Яна ў нас сапраўды гераічная. Акрамя таго, у беларусаў ёсць запыт на справядлівасць. Наогул, працуючы з Прэзідэнтам і аналізуючы яго выступленні, я вызначыла для сябе, што самае галоўнае - гэта людзі і справядлівае стаўленне да іх. Усё проста", - лічыць старшыня Савета Рэспублікі.

Навучэнец дзясятага класа Дзмітрый Іванькоў расказаў, што ў будучым плануе паступіць на факультэт міжнародных адносін і ўдзяляе шмат часу вывучэнню грамадазнаўства. "Наведванне Савета Рэспублікі - гэта выдатная магчымасць даведацца аб рабоце дзяржаўнага апарату. А яшчэ мне спадабаліся музейныя экспазіцыі, і экскурсавод быў добры. Акрамя таго, было цікава даведацца, якая падзея ў жыцці Наталлі Іванаўны (Наталлі Качанавай. - Заўвага БЕЛТА) вызначыла яе далейшае працаўладкаванне", - падзяліўся ўражаннямі малады чалавек.-0- 

Фота Сяргея Шэлега


Падпісвайцеся на нас у
Twitter
Топ-навіны
Свежыя навіны Беларусі