28 снежня, Віцебск /Кар. БЕЛТА/. Пытанні арганізацыі электраацяплення, пераразмеркавання спецыяліста, спагнання запазычанасці за аказаныя паслугі, арганізацыі работы філіяла Віцебскага аблспажыўтаварыства і іншыя разгледзеў сёння старшыня Палаты прадстаўнікоў Уладзімір Андрэйчанка. Спікер правёў асабісты прыём грамадзян і юрыдычных асоб ва Ушацкім раённым выканаўчым камітэце, паведамілі карэспандэнту БЕЛТА ў райвыканкаме.
Жыхары паўночнага рэгіёна звярнуліся да старшыні Палаты прадстаўнікоў з 7 пытаннямі. За дапамогай у пераразмеркаванні сваёй дачкі прыйшла жыхарка Наваполацка - ветэрынарны ўрач працуе ў Петрыкаўскай райветстанцыі ў Гомельскай вобласці. Жанчына папрасіла аказаць садзейнічанне ў пераводзе спецыяліста. Уладзімір Андрэйчанка па тэлефоне абмеркаваў пытанне з кіраўніком Мінадукацыі, у выніку будзе падрыхтаваны адпаведны пакет дакументаў аб пераразмеркаванні дачкі жанчыны ва Ушацкі раён.
Індывідуальны прадпрымальнік з Ушач звярнуў увагу на запазычанасць за аказаныя жывёлагадоўчай гаспадарцы паслугі па грузаперавозцы. Просьбу мужчыны спагнаць гэтыя сродкі на карысць ІП па даручэнні спікера будуць вырашаць у Бешанковіцкім райвыканкаме. Пытанне павінны закрыць у першым паўгоддзі 2023 года.
Пенсіянер з вёскі Дарошкавічы паскардзіўся на недастатковую работу Ушацкага філіяла Віцебскага аблспажыўтаварыства. Паводле яго слоў, у аўтакраме і бліжэйшых магазінах значна зменшыўся як асартымент пастаўляемай прадукцыі, так і яе колькасць. Варыянтаў мясных вырабаў усяго некалькі, сыроў амаль няма, ды і з цукеркамі бываюць праблемы, што выклікае нездавальненне мясцовых жыхароў асабліва ў перадсвяточны перыяд. Уладзімір Андрэйчанка даручыў Віцебскаму аблспажыўтаварыству і Ушацкаму райспажыўтаварыству сумесна вырашаць пытанні па забеспячэнні попыту насельніцтва і асартыменту ў магазінах і аўтакрамах, а намесніку старшыні райвыканкама ўзяць пытанне на асабісты кантроль.
Каменціруючы сітуацыю, ён падкрэсліў: "Тэма сур'ёзная, у першую чаргу, для Віцебскай вобласці, паколькі ў ёй, як у ніякай іншай, самая вялікая колькасць сельскіх населеных пунктаў - іх 6,2 тыс., дзе пражывае малая колькасць людзей. Вядома, аблспажыўсаюз нясе вялікія затраты, таму што два разы на тыдзень трэба прыязджаць краме - а гэта паліва, заработная плата і гэтак далей. Тут трэба знаходзіць рашэнні і ўладам на месцы. Бо ёсць прыбытковыя галіны, такія як нарыхтоўчая дзейнасць, перапрацоўчая прамысловасць Белкаапсаюза. На гэта трэба рабіць стаўку, каб перакрываць рознічны гандаль і іншыя напрамкі. Не трэба разлічваць толькі на тое, што дзяржава павінна прымаць удзел і даваць нейкія прэферэнцыі - яны і так дадзены. Трэба больш актыўна працаваць самім".
Таксама да старшыні Палаты прадстаўнікоў звярнуліся з пытаннямі аб садзейнічанні ў працаўладкаванні, арганізацыі электраацяплення ў жылым доме і іншымі. Спікер адзначыў, што на асабістыя прыёмы людзі прыходзяць з рознымі просьбамі, але ўсе пытанні патрабуюць вельмі ўважлівага і аб'ектыўнага разгляду. "Не сакрэт, што паспяховае развіццё любога рэгіёна залежыць ад таго, наколькі насельніцтва давярае ўладзе і наколькі ўлада адкрыта для насельніцтва. Ва Ушацкім раёне ў гэтым пытанні шмат робіцца. За мінулы год у "адно акно" звярнуліся больш як 2 тыс. чалавек, - сказаў ён. - Рэгулярна кіраўніцтвам раёна праводзяцца прыёмы насельніцтва, тым не менш, у людзей ёсць пытанні, з якімі яны хочуць звярнуцца ў вышэйшыя органы і тыя, па якіх патрабуюцца проста растлумачэнні. Мая пазіцыя такая: усе пытанні трэба вырашаць на месцы, каб людзям не даводзілася звяртацца паўторна. Таму важна для грамадзян быць пачутымі, важна чулае стаўленне да іх".
Спікер дадаў, што ва Ушацкім раёне работа з насельніцтвам арганізавана нядрэнна, і яна будзе прадоўжана.-0-
