2 лістапада, Мінск /Кар. БЕЛТА/. Перагляд мінімальнага страхавога стажу, які неабходны для назначэння працоўнай пенсіі, у бок змяншэння або павелічэння ў Беларусі не плануецца. Аб гэтым паведаміў намеснік міністра працы і сацыяльнай абароны Валерый Кавалькоў у час анлайн-канферэнцыі на сайтах БЕЛТА і Мінпрацы.
"Перыяд фарміравання пенсійных правоў не павінен быць меншым за перыяд атрымання пенсійных выплат. Устаноўленая працягласць перыяду выплаты ўзносаў на пенсійнае страхаванне (з 16 гадоў 6 месяцаў у 2018 годзе да 20 гадоў да 2025 года) не перавышае сярэдні перыяд выплаты пенсій. Пытанне аб павелічэнні мінімальнага перыяду выплаты страхавых узносаў для фарміравання пенсійных правоў не прапрацоўваецца", - сказаў Валерый Кавалькоў.
Таксама не прапрацоўваецца і пытанне аб змяненні прынятага рашэння аб павышэнні пенсійнага ўзросту. "Пры гэтым адзначу, што пенсійны ўзрост нават пасля яго павелічэння да 58 гадоў для жанчын і 63 гадоў для мужчын не перасягне пенсійны ўзрост, устаноўлены ў Польшчы і Італіі пасля яго зніжэння", - дадаў намеснік міністра.
У Мінпрацы адзначаюць, што на практыцы маюць месца выпадкі, калі да моманту дасягнення агульнаўстаноўленага пенсійнага ўзросту чалавек не сфарміраваў патрабны стаж работы з выплатай страхавых узносаў. Аднак статыстыка па такіх асобах не вядзецца. Што датычыцца мер па садзейнічанні ў працаўладкаванні, то яны прадугледжаны для ўсіх грамадзян.
Акрамя таго, гарантыі ў частцы заключэння, прадаўжэння кантрактаў з грамадзянамі перадпенсійнага ўзросту замацаваны заканадаўча. Яны рэгулююцца ўказам ад 12 красавіка 2000 года нумар 180 "Аб парадку прымянення Дэкрэта Прэзідэнта Рэспублікі Беларусь ад 26 ліпеня 1999 года нумар 29". Згодна з абзацам трэцім часткі першай пункта другога, з работнікам, які добрасумленна працуе і не дапускае парушэнняў працоўнай, выканальніцкай і вытворча-тэхналагічнай дысцыпліны, якому да дасягнення агульнаўстаноўленага пенсійнага ўзросту застаецца не больш за два гады, кантракт прадаўжаецца не менш як да дасягнення названага ўзросту. Узрост, што дае права на пенсію па ўзросце на агульных падставах, вызначаецца адносна кожнага каляндарнага года (года звароту за пенсіяй), а не да даты нараджэння.-0-
