Пуцін: на фоне заходняга націску Расія і Беларусь адчуваюць сябе абсалютна ўпэўнена і надзейна

24 мая, Мінск /Кар. БЕЛТА/. На фоне заходняга націску Расія і Беларусь адчуваюць сябе абсалютна ўпэўнена і надзейна. Аб гэтым Прэзідэнт Расіі Уладзімір Пуцін заявіў у Мінску на перагаворах з Прэзідэнтам Беларусі Аляксандрам Лукашэнкам у пашыраным складзе, перадае карэспандэнт БЕЛТА.

Уладзімір Пуцін адзначыў, што забеспячэнне абароны і бяспекі з'яўляецца надзвычай важным напрамкам супрацоўніцтва Беларусі і Расіі. "Гэта пытанні, якія заўсёды знаходзяцца ў полі зроку Прэзідэнта Беларусі і маім. Мы заўсёды з калегамі з абодвух бакоў гэтым займаемся, асабліва апошнім часам", - сказаў Прэзідэнт.

"Той напрамак, які быў выбраны заходняй супольнасцю адносна і Беларусі, і Расіі (варожасць, спробы стрымаць наша развіццё, нанесці ўрон нашаму суверэнітэту), - нічога ні ў кога да гэтага часу ў гэтых адносінах не атрымлівалася і, упэўнены, нічога не атрымаецца. Мы адчуваем сябе абсалютна ўпэўнена, надзейна і будзем умацоўваць наша ўзаемадзеянне і па гэтых важнейшых напрамках дзейнасці", - падкрэсліў Уладзімір Пуцін.

Гаворачы аб саюзным будаўніцтве, кіраўнік дзяржавы канстатаваў, што ў гэтым напрамку ўрады дзвюх краін апошнім часам зрабілі вельмі шмат. Створаны ўмовы для далейшай кааперацыі ў розных сферах. "Умацоўваць дабрабыт грамадзян Беларусі і Расійскай Федэрацыі - гэта наша агульная задача", - звярнуў увагу Прэзідэнт.-0-