14 ліпеня, Мінск /Кар. БЕЛТА/. Поўнасцю прышчэпленым ад COVID-19 людзям немэтазгодна здаваць аналіз на антыцелы перад падарожжам. Гэта вынікае з інфармацыі, размешчанай на сайце Рэспубліканскага цэнтра гігіены, эпідэміялогіі і грамадскага здароўя са спасылкай на матэрыялы СААЗ, паведамляе БЕЛТА.
"Аналізы на антыцелы не з'яўляюцца паўнацэнным спосабам вызначыць наяўнасць імунітэту, таму імі не рэкамендуецца кіравацца пры прыняцці рашэння аб бяспецы паездкі", - гаворыцца ў тлумачэннях на сайце цэнтра.
Адзначаецца, што розныя вакцыны ў рознай ступені стымулююць выпрацоўку антыцел, але яны таксама ўздзейнічаюць на іншы складнік імуннай сістэмы - клетачны імунітэт, які фарміруецца за кошт актывізацыі Т-лімфацытаў і не вызначаецца ў аналізе на антыцелы.
Акрамя таго, ёсць няпэўнасць наконт тэрміну дзеяння імуннага адказу, таму з цягам часу надзейнасць такіх аналізаў змяншаецца.-0-