04 лютага 2026, 10:46

Праверка УС па даручэнні Прэзідэнта прадаўжаецца ў адной з часцей 72-га вучэбнага цэнтра

4 лютага, Барысаў /Кар. БЕЛТА/. Праверка Узброеных Сіл, якая праводзіцца па даручэнні Прэзідэнта, прадаўжаецца ў адной з часцей 72-га аб'яднанага вучэбнага цэнтра падрыхтоўкі прапаршчыкаў і малодшых спецыялістаў (АВЦ), перадае карэспандэнт БЕЛТА.

"У адпаведнасці з зацверджанай Галоўнакамандуючым задумай, прадаўжаецца праверка шэрага злучэнняў і воінскіх часцей. Праверка мае раптоўны характар. Ажыццяўляецца праверка не толькі баявых часцей на прадмет гатоўнасці да выканання задач па прызначэнні (зусім нядаўна мы скончылі правяраць адну з механізаваных брыгад). Сёння комплексная група ў складзе службовых асоб Дзяржаўнага сакратарыята Савета бяспекі і Камітэта дзяржаўнага кантролю прыбыла ў адну з воінскіх часцей, дзе тэхніка знаходзіцца на захоўванні. Гэта значыць, што такая тэхніка прызначана для воінскіх часцей, якія фарміруюцца на ваенны час", - сказаў Аляксандр Вальфовіч.

Ён адзначыў, што належнае захоўванне тэхнікі - важны аспект боегатоўнасці. "Мы Узброеныя Сілы не разгортваем, не павялічваем у мірны час, як нашы суседзі на тэрыторыі Польшчы і Літвы. Але тым не менш мы гатовы да таго, каб разгарнуць нашы Узброеныя Сілы, як гаварыў Галоўнакамандуючы, да той колькасці, якая неабходна для абароны дзяржавы. Для гэтага трэба мець адпаведныя абслужаныя ўзоры ўзбраення, ваеннай тэхнікі. Гэта нармальная сусветная практыка", - адзначыў дзяржсакратар Савета бяспекі.

Комплексная група праверыць, у якіх умовах захоўваецца тэхніка, ці выкананы ўвесь комплекс работ па яе пастаноўцы на працяглае захоўванне, ці запраўлена яна палівам і іншыя пытанні. "Пастаўлена задача і ўручана распараджэнне камандзіру 72-га АВЦ на зняцце шэрага ўзораў ваеннай тэхнікі з захоўвання. Гэта значыць з кожнага падраздзялення будуць зняты два-тры ўзоры: танкі, баявыя машыны пяхоты, аўтамабілі і іншыя. Пасля гэтага будзе зроблены кантрольны прабег", - падкрэсліў Аляксандр Вальфовіч.

Старшыня Камітэта дзяржаўнага кантролю Васіль Герасімаў указаў на тое, што для яго і супрацоўнікаў яго ведамства гэта не першая праверка воінскіх часцей. Акрамя раптоўных праверак па даручэнні Прэзідэнта, работнікі КДК наведвалі падраздзяленні, дзе правяралі ўсе аспекты - ад правядзення закупак да захоўвання тэхнікі.

Паводле слоў дзяржсакратара, папярэдні агляд паказаў, што да пытанняў зберажэння, захоўвання тэхнікі ваеннаслужачыя падышлі адказна. "Усе ўзоры стаяць у сховішчах пад навесамі, запраўлены. Канчатковы вынік работы будзе падведзены крыху пазней", - дадаў Аляксандр Вальфовіч.

Ён таксама даў папярэднюю ацэнку ранейшай праверцы. "З баявых воінскіх часцей мы праверылі толькі адно падраздзяленне. Ваеннаслужачыя паказалі цалкам дастойныя вынікі, паказалі, што яны вынослівыя, могуць прымяняць сваё ўзбраенне, ваенную тэхніку і ў дзённых, і ў начных умовах, выкарыстоўваючы сучасныя беларускія прыцэлы. Недахопы ёсць, яны яшчэ будуць прааналізаваны, будзе праведзены разбор Але гэта ў канцы. У нас наперадзе яшчэ шмат работы. Мы чаргуем праверкі баявых воінскіх часцей з часцямі, дзе тэхніка стаіць на захоўванні. Куды мы паедзем далей? Гэта вызначыць Галоўнакамандуючы", - адзначыў дзяржаўны сакратар.

Аляксандр Вальфовіч звярнуў увагу на тое, што адначасова ідуць праверкі па даручэнні Прэзідэнта і па планах Мінабароны. "Тут абсалютна нічога звышнатуральнага няма. Учора, дарэчы, кіраўнік дзяржавы дакладна растлумачыў, чаму так адбываецца. Ёсць рашэнне Прэзідэнта як Галоўнакамандуючага на прадмет раптоўнай праверкі стану Узброеных Сіл, гэта значыць аб тым, што неабходна зрабіць зрэз падрыхтоўкі нашых падраздзяленняў для выканання задач па прызначэнні. Але ёсць таксама планы раптоўных праверак іншых праверак іншых падраздзяленняў па лініі міністра абароны. Гэтыя планы састыкаваны камісіяй Дзяржаўнага сакратарыята Савета бяспекі. Мы не перашкаджаем і не парушаем планы міністра абароны па праверцы шэрага злучэнняў і воінскіх часцей", - рэзюмаваў ён.

Як паведамлялася БЕЛТА, маштабная праверка Узброеных Сіл па даручэнні кіраўніка дзяржавы пачалася яшчэ 16 студзеня. Аляксандр Лукашэнка трымае на асабістым кантролі яе ход. Выпрацавана новая сістэма, пры якой Прэзідэнт, абмінаючы Міністэрства абароны і Генеральны штаб, прыводзіць у баявую гатоўнасць воінскія часці. Першачарговая мэта такой праверкі - убачыць аб'ектыўную карціну. Менавіта таму мерапрыемствы маюць раптоўны характар.-0-