25 лютага, Мінск /Кар. БЕЛТА/. Працуючы па-старому, мы не зможам ствараць новую інфармацыйную прастору, падкрэсліў на калегіі Міністэрства інфармацыі кіраўнік ведамства Аляксандр Карлюкевіч, гаворачы аб рэгіянальных СМІ, перадае карэспандэнт БЕЛТА.
"Згодна з новым заканадаўствам, з 1 снежня 2018 года можна рэгістраваць сеткавыя выданні, але пакуль гэтым правам скарысталіся толькі адзінкавыя рэсурсы. А хіба не гэты крок дазваляе ствараць асяроддзе новага характару або дакладней займаць сваё месца ва ўжо існуючым асяроддзі", - адзначыў міністр інфармацыі.
Тыражы мясцовых друкаваных выданняў у 10 разоў вышэйшыя за колькасць наведвання інтэрнэт-версій сайтаў гэтых выданняў. "Навацыі і новая стылістыка змогуць прыйсці толькі тады, калі павялічым скорасць, якая будзе спалучацца з прагрэсам і разуменнем таго, што за інтэрнэт-рэсурсамі будучыня", - сказаў Аляксандр Карлюкевіч.
Ён дадаў, што ў 2018 годзе Міністэрства інфармацыі развівала метадычна-кансультатыўную работу з рэгіянальнымі СМІ, падрабязна аналізуючы іх.-0-
