16 верасня, Мінск /Кар. БЕЛТА/. Пасяджэнне экспертнай групы па ўзгадненні праекта Праграмы супрацоўніцтва дзяржаў - удзельніц СНД у галіне дэрадыкалізацыі прайшло ў штаб-кватэры Садружнасці Незалежных Дзяржаў у Мінску. Аб гэтым БЕЛТА паведамілі ў прэс-службе Выканаўчага камітэта СНД.
Пасяджэнне праведзена ў змешаным фармаце, у ім удзельнічалі эксперты і паўнамоцныя прадстаўнікі Азербайджана, Беларусі, Кыргызстана, Малдовы, Расіі, Узбекістана, Антытэрарыстычнага цэнтра дзяржаў СНД, Бюро па каардынацыі барацьбы з арганізаванай злачыннасцю і іншымі небяспечнымі відамі злачынстваў на тэрыторыі дзяржаў СНД, а таксама супрацоўнікі Выканаўчага камітэта Садружнасці.
Аб неабходнасці стварыць такую праграму супрацоўніцтва заявіў прэзідэнт Узбекістана Шаўкат Мірзіёеў 18 снежня 2020 года на саміце кіраўнікоў дзяржаў СНД. Праект праграмы быў распрацаваны Узбекістанам у маі 2021 года. Асноўная мэта дакумента - умацаванне і развіццё супрацоўніцтва краін Садружнасці ў галіне дэрадыкалізацыі, у тым ліку рэінтэграцыя ў мірнае жыццё тых, хто вяртаецца з зон узброеных канфліктаў.
Прыняцце праграмы дасць магчымасць удасканаліць і зблізіць нацыянальныя заканадаўствы, пасадзейнічае развіццю міжнароднай прававой базы, кансалідуе намаганні дзяржаў - удзельніц і органаў СНД у галіне дэрадыкалізацыі. Акрамя таго, праграма прадугледжвае комплексныя сумесныя міжведамасныя прафілактычныя, аператыўна-вышуковыя мерапрыемствы і спецаперацыі, інфармацыйнае і навуковае забеспячэнне супрацоўніцтва, узаемадзеянне ў падрыхтоўцы кадраў, павышэнні кваліфікацыі спецыялістаў.
Пасля разгляду праекта праграмы ў дзяржавах - удзельніцах СНД да яго паступілі заўвагі і прапановы ад экспертаў Азербайджана, Беларусі, Кыргызстана, Расіі, Антытэрарыстычнага цэнтра дзяржаў СНД, Бюро па каардынацыі барацьбы з арганізаванай злачыннасцю і іншымі небяспечнымі відамі злачынстваў на тэрыторыі краін Садружнасці.
На пасяджэнні экспертнай групы гэтыя заўвагі і прапановы абмеркавалі, з іх улікам удзельнікі сустрэчы ў асноўным узгаднілі праект праграмы. Пры гэтым, зыходзячы з неабходнасці карэкціраваць тэрміны рэалізацыі дакумента, змянілі яго назву: праект Праграмы супрацоўніцтва дзяржаў - удзельніц СНД у галіне дэрадыкалізацыі на 2023-2025 гады. Вырашана таксама, што пасля дапрацоўкі праект будзе разгледжаны на чарговым пасяджэнні экспертнай групы ў студзені 2022 года.-0-
