Прадстаўнік Генпракуратуры Беларусі стане ўдзельнікам форуму па генацыдзе ў Карэліі

1 жніўня, Мінск /Кар. БЕЛТА/. Прадстаўнік Генеральнай пракуратуры Беларусі прыме ўдзел у акруговым навукова-практычным форуме "Без тэрміну даўнасці. Злачынствы нацыстаў і іх памагатых на Паўночным Захадзе Расіі ў гады Вялікай Айчыннай вайны. Ключавыя пункты гістарычнай памяці", які пройдзе 1-2 жніўня ў Петразаводску (Рэспубліка Карэлія), паведамляе БЕЛТА са спасылкай на нагляднае ведамства.

Форум пройдзе ў развіццё судовага працэсу ў Вярхоўным Судзе Рэспублікі Карэлія. Сёння там закончыўся разгляд заявы пракурора Карэліі аб прызнанні ваеннымі злачынствамі і злачынствамі супраць чалавечнасці, генацыдам савецкага народа ўстаноўленых і нававыяўленых злачынстваў, учыненых нямецка-фашысцкімі захопнікамі, акупацыйнымі ўладамі і войскамі Фінляндыі на тэрыторыі Карэла-Фінскай ССР у гады Вялікай Айчыннай вайны.

Па запрашэнні расійскага боку ў судовым пасяджэнні прыняў удзел намеснік начальніка ўпраўлення па наглядзе за расследаваннем асабліва важных крымінальных спраў Генеральнай пракуратуры Беларусі Сяргей Шыкунец.

Раней судом да матэрыялаў справы далучаны перададзеныя Генеральнай пракуратурай Беларусі звесткі аб фактах генацыду грамадзян Савецкага Саюза беларускай нацыянальнасці, якія пражывалі ў КФССР у гады акупацыі, устаноўленыя ў ходзе расследавання крымінальнай справы аб генацыдзе беларускага народа.-0-