25 мая, Мінск /Кар. БЕЛТА/. Пошукава-выратавальная аперацыя на Эльбрусе паспяхова завершана. Беларускія турысты перапраўлены ў г.Лермантаў Стаўрапольскага края. Аб гэтым БЕЛТА паведамілі ў прэс-службе МНС.
Як удакладняецца, пагрозы жыццю турыстаў няма. Спецыялісты псіхалагічнай службы Галоўнага ўпраўлення МНС Расіі па Карачаева-Чаркескай Рэспубліцы гатовы аказаць неабходную дапамогу.
Пошукавыя работы прадаўжаліся 36 гадзін. Расійскія ратавальнікі знайшлі групу беларускіх турыстаў на вышыні 3800 м пад вяршыняй гары Уцюг. Пошукава-выратавальная аперацыя была арганізавана ў складаным горным рэльефе мясцовасці, ва ўмовах неспрыяльных з'яў надвор'я. Быў шквалісты вецер і ішоў снег.
Як удакладняецца, сёння раніцай выратаваныя турысты былі спушчаны на вышыню 2600 м верталётам прыватнай кампаніі.-0-
