Пяткевіч правяла маніторынг зваротаў грамадзян па рабоце раённых устаноў аховы здароўя

2 верасня, Бялыніцкі раён /Кар. БЕЛТА/. Першы намеснік кіраўніка Адміністрацыі Прэзідэнта Наталля Пяткевіч правяла ў Бялыніцкім раёне маніторынг сітуацыі са зваротамі грамадзян, звязаных з работай раённых устаноў аховы здароўя, перадае карэспандэнт БЕЛТА.

Наталля Пяткевіч наведала Ермалавіцкі ФАП, Нежкаўскую амбулаторыю і раённую паліклініку ў Бялынічах. Мэта - на месцы ўбачыць сітуацыю са зваротамі грамадзян, якія паступаюць у Адміністрацыю Прэзідэнта і СМІ, з'яўляюцца ў сацыяльных сетках. "Мы за імі сочым і аналізуем, - адзначыла яна. - Шмат зваротаў датычыцца менавіта чэргаў у медыцынскіх установах, і таму для маніторынгу сітуацыі мы робім такія наведванні".

Першы намеснік кіраўніка Адміністрацыі Прэзідэнта паглядзела ўсе ступені медыцынскай дапамогі: ФАП, амбулаторыю і паліклініку. "Тут сітуацыя, можна сказаць, проста ідэальная - чэргаў няма, практычна поўная забяспечанасць, у тым ліку вузкімі спецыялістамі, - адзначыла яна. - Трэба сказаць, калі ідзе такая добрая звязка паміж кіраўніцтвам медыцынскай установы і мясцовай уладай, а яшчэ ёсць шэфства гаспадаркі або прадпрыемства, вынік вельмі добры. Праблем няма, калі вырашаюцца пытанні арэнднага жылля, паляпшаюцца сацыяльна-бытавыя ўмовы, у рэгіёне пражывання створана неабходная інфраструктура. Зладжаная работа на агульную справу ўсіх структур дае свой вынік".
Немалаважны момант, калі маладыя спецыялісты прыязджаюць у райцэнтр і застаюцца тут працаваць, абзаводзяцца сем'ямі. А Бялынічы гэта не вялікі горад, як і шэраг іншых у нашай краіне. "Сумесная работа ўсіх на агульную мэту сапраўды дае тую карціну, якую сёння можна тут убачыць", - акцэнтавала яна.