31 снежня, Мінск /Кар. БЕЛТА/. Паступіла ўжо каля 800 прапаноў ад грамадзян па праекце змяненняў і дапаўненняў Канстытуцыі Беларусі. Аб гэтым расказаў міністр інфармацыі Уладзімір Пярцоў у праграме "Клуб рэдактараў" на тэлеканале "Беларусь 1", паведамляе БЕЛТА.
"Цяпер ідзе ўсенароднае абмеркаванне. Ужо каля 800 дапаўненняў, заўваг паступіла ад некалькіх соцень неабыякавых грамадзян нашай краіны. Работа ідзе, і яна будзе прадаўжацца аж да таго моманту, калі мы будзем вымушаны ўжо завяршыць яе і выставіць праект абноўленай Канстытуцыі на ўсенароднае галасаванне", - расказаў Уладзімір Пярцоў.
Як паведамлялася, праект змяненняў і дапаўненняў Канстытуцыі Беларусі для ўсенароднага абмеркавання быў абнародаваны 27 снежня на Нацыянальным прававым інтэрнэт-партале. Каардынуе гэту работу Нацыянальны цэнтр прававой інфармацыі.
Меркаванні грамадзян па праекце змяненняў і дапаўненняў Канстытуцыі, а таксама магчымыя прапановы накіроўваюцца ў Нацыянальны цэнтр прававой інфармацыі: па электроннай пошце sbor@ncpi.gov.by; праз запаўненне электроннай формы, якая знаходзіцца на Нацыянальным прававым інтэрнэт-партале па адрасе sbor.pravo.by; у пісьмовым выглядзе па адрасе: 220030, г. Мінск, вул. Берсана, 1а, НЦПІ, з паметкай "Канстытуцыя".
З праектам змяненняў і дапаўненняў Канстытуцыі можна таксама азнаёміцца на інтэрнэт-партале Прэзідэнта Рэспублікі Беларусь.-0-
