9 красавіка, Мінск /Кар. БЕЛТА/. У 2022 годзе эпідэміялагічная небяспека каранавіруснай інфекцыі будзе мінімізавана. Такое меркаванне выказаў міністр аховы здароўя Дзмітрый Піневіч у праграме "Маркаў. Нічога асабістага" на тэлеканале АНТ, паведамляе БЕЛТА.
Дзмітрый Піневіч нагадаў, што ў Беларусі вядзецца распрацоўка ўласнай вакцыны. Паколькі гэты складаны працэс пачаўся фактычна з нуля, хуткім ён быць не можа. Але ў наступным годзе дзякуючы аператыўнай рабоце вучоных вакцына павінна ўжо з'явіцца. Да гэтага часу, лічыць міністр, каранавірус будзе не такі небяспечны, як сёння.
"З майго пункту гледжання, сама па сабе эпідэміялагічная небяспека цяперашняй каранавіруснай інфекцыі будзе мінімізавана. З вакцынамі, без вакцын - так сам ідзе эпідэмічны працэс", - адзначыў Дзмітрый Піневіч.
Пры гэтым ён звярнуў увагу на тое, што распрацоўка - важны працэс. Фарміраванне калектыву, аснашчэнне прадпрыемстваў абсталяваннем, назапашванне вопыту і вызначэнне алгарытмаў дзеянняў - усё гэта дапаможа ў будучым, калі спатрэбіцца стварыць вакцыну ад іншага захворвання.
З сярэдзіны красавіка ў Беларусі будуць выпускаць прамысловы варыянт расійскай вакцыны, разліў якой пачаўся ў канцы сакавіка. Асноўнай задачай, падкрэсліў кіраўнік Міністэрства аховы здароўя, з гэтага часу будзе "прышчапляцца, прышчапляцца і прышчапляцца".-0-
