Сцяг Пятніца, 29 сакавіка 2024
Усе навіны
Усе навіны
Грамадства
25 мая 2021, 15:39

Піневіч прадставіў на сесіі Сусветнай асамблеі аховы здароўя вопыт Беларусі па барацьбе з COVID-19

25 мая, Мінск /Кар. БЕЛТА/. Міністр аховы здароўя Дзмітрый Піневіч прадставіў на 74-й сесіі Сусветнай асамблеі аховы здароўя, якая праходзіць анлайн, нацыянальны вопыт па пераадоленні пандэміі COVID-19, паведамляе БЕЛТА са спасылкай на прэс-службу Міністэрства аховы здароўя.

Дзмітрый Піневіч упэўнены, што нацыянальны кантэкст - вызначальны фактар пры выпрацоўцы адказу на пандэмію. Беларусь выбрала сваю ўласную лінію паводзін. "Галоўны вынік у тым, што мы ў аптымальнай меры захавалі жыццядзейнасць дзяржавы, перш за ўсё яе эканомікі, але пры гэтым забяспечылі максімальную ахову насельніцтва. Сёння мы прадаўжаем удзяляць першарадную ўвагу гэтаму напрамку. У краіне праходзіць актыўная кампанія па вакцынацыі. Распрацоўваем уласную вакцыну. Разглядаем у перспектыве магчымасць экспарту вырабленых намі вакцын у іншыя краіны праз адпаведныя механізмы СААЗ", - сказаў ён.

Міністр аховы здароўя ў сваім выступленні таксама заўважыў, што ў сучасным свеце тэма грамадскай аховы здароўя становіцца асабліва актуальнай. Нявырашаныя або новыя выклікі ў галіне аховы здароўя толькі абвастраюць негатыўныя тэндэнцыі ў глабальнай палітыцы і ўскладняюць устойлівае развіццё.

"Мы вітаем сістэмныя шматгадовыя намаганні генеральнага дырэктара па адаптацыі СААЗ да сучасных рэалій. Беларусь актыўна ўдзельнічала ў шматмесячным працэсе пад эгідай дэлегацыі Еўрапейскага саюза па распрацоўцы адпаведнай рэзалюцыі. Мы таксама падтрымліваем рашэнне Сусветнай асамблеі аховы здароўя аб запуску міжурадавага працэсу па распрацоўцы рамачнай канвенцыі па гатоўнасці і адказе на пандэміі", - падкрэсліў Дзмітрый Піневіч.

Паводле яго слоў, "Беларусь гатова актыўна і канструктыўна ўдзельнічаць у маючых адбыцца перагаворах, а таксама ў рэалізацыі палажэнняў рэзалюцыі Сусветнай асамблеі аховы здароўя па рэагаванні на надзвычайныя сітуацыі ў галіне аховы здароўя ў якасці члена Выканаўчага савета СААЗ, калі дзяржавы-члены акажуць нам гонар і падтрымаюць кандыдатуру Беларусі ў гэты орган". Міністр нагадаў, што кандыдатура Беларусі была ўзгоднена ў мінулым годзе на рэгіянальным узроўні.

Дзмітрый Піневіч адзначыў: Беларусь як член Выканаўчага савета гатова ўносіць уклад у работу савета і па іншых тэмах аховы здароўя, перш за ўсё па тых, па якіх набыты шматгадовы станоўчы вопыт.

Міністр аховы здароўя выказаў надзею, што цяперашняя сесія Сусветнай асамблеі аховы здароўя азнамянуе сабой ключавы момант ва ўмацаванні ролі і патэнцыялу СААЗ у рэагаванні на надзвычайныя сітуацыі ў галіне грамадскай аховы здароўя.

Галоўны штогадовы форум СААЗ праходзіць анлайн з удзелам 194 краін, у тым ліку Беларусі. Сесія ўдзеліць асноўную ўвагу барацьбе з пандэміяй і прадухіленню новых надзвычайных сітуацый. Таксама спецыялісты абмяркоўваюць устойлівасць да антыбіётыкаў, біялагічную бяспеку лабараторый, псіхічнае здароўе ў час пандэміі, ВІЧ/СНІД, пытанні поліяміэліту, малярыі і многія іншыя.

На сесіі таксама абмяркуюць рэалізацыю Мэт у галіне ўстойлівага развіцця і пастаўленых СААЗ Мэт "трох мільярдаў". Размова ідзе аб павелічэнні колькасці атрымальнікаў павышанай абароны ад надзвычайных сітуацый у галіне аховы здароўя на 1 млрд, колькасці людзей, якіх ахоплівае агульнанацыянальная праграма забеспячэння здароўя, на 1 млрд, а таксама колькасці насельніцтва, здароўе і дабрабыт якога палепшацца, таксама на 1 млрд.

Сусветная асамблея аховы здароўя - галоўны дырэктыўны орган СААЗ, у яе склад уваходзяць усе дзяржавы - члены арганізацыі.-0-

Падпісвайцеся на нас у
Twitter
Топ-навіны
Свежыя навіны Беларусі