14 снежня, Мінск /Кар. БЕЛТА/. Пандэмія COVID-19 значна паскорыла ўкараненне тэлемедыцыны ў практычную ахову здароўя, заявіў міністр аховы здароўя Дзмітрый Піневіч, выступаючы ў час Еўрапейскай канферэнцыі СААЗ па выкарыстанні лічбавых рашэнняў у мэтах барацьбы з неінфекцыйнымі захворваннямі, якая праходзіць у Маскве. Аб гэтым БЕЛТА паведамілі ў прэс-службе Міністэрства аховы здароўя.
"Пандэмія COVID-19 прымусіла паглядзець на тэлемедыцыну пад новым вуглом і ў значнай меры паскорыць яе ўкараненне ў практычную ахову здароўя. Калі за першае паўгоддзе 2019 года было выканана 9042 кансультацыі, то ў першым паўгоддзі 2020 года колькасць выкананых кансультацый павялічылася на 60,6 працэнта (у параўнанні з першым паўгоддзем 2019 года) і склала 14 518, а за першае паўгоддзе 2021 года - 18 056, рост у 2 разы ў параўнанні з першым паўгоддзем 2019 года", - сказаў Дзмітрый Піневіч.
Ён адзначыў, што пандэмія COVID-19 унесла свае карэктывы і садзейнічала ўнясенню змяненняў і дапаўненняў у закон "Аб ахове здароўя", якія даюць магчымасць арганізаваць узаемадзеянне ўрача з пацыентам з выкарыстаннем тэлемедыцынскіх тэхналогій.
Яшчэ адной лічбавай тэхналогіяй, якая актыўна выкарыстоўваецца ў перыяд пандэміі COVID-19, стаў электронны рэцэпт. У Беларусі гэта сістэма ўстаноўлена ва ўсіх арганізацыях аховы здароўя, аптэках дзяржаўнай і прыватнай форм уласнасці. Калі ў першым паўгоддзі 2019 года ў аптэках было адпушчана амаль 1 млн 386,3 тыс. рэцэптаў, то ў першым паўгоддзі 2020-га - каля 1 млн 798 тыс. (рост на 31,4 працэнта ў параўнанні з першым паўгоддзем 2019 года), а ў першым паўгоддзі 2021 года - больш за 2,1 млн (павелічэнне на 53,9 працэнта ў параўнанні з першым паўгоддзем 2019 года).
Канферэнцыя СААЗ праходзіць 14-15 снежня ў Маскве. Прымаючым бокам выступае Міністэрства аховы здароўя Расійскай Федэрацыі сумесна з Еўрапейскім офісам СААЗ. Гэта інтэрактыўная канферэнцыя праводзіцца ў гібрыдным фармаце. Прадстаўлены прыклады работы шэрага краін, устаноў, якія з'яўляюцца лідарамі ў сферы выкарыстання вялікіх даных, індустрыі лічбавай аховы здароўя, а таксама прыклады з жыцця людзей, якія жывуць з неінфекцыйнымі захворваннямі (НІЗ). Мэта канферэнцыі - абмеркаваць перавагі і недахопы новых тэхналогій з пункту гледжання грамадскай аховы здароўя, а таксама прадставіць доказную базу адносна магчымасцей іх шырокамаштабнага ўкаранення ў сферы барацьбы з НІЗ.-0-
