28 кастрычніка, Мінск /Кар. БЕЛТА/. Да канца года ў Беларусі плануецца вакцынаваць 5 млн чалавек, што дапаможа спыніць эпідпрацэс. Аб гэтым заявіў сёння журналістам міністр аховы здароўя Дзмітрый Піневіч, паведамілі БЕЛТА ў прэс-службе Міністэрства аховы здароўя.
"Аналіз захваральнасці выклікае асцярожны аптымізм, аб гэтым гаварыў і кіраўнік дзяржавы, які валодае поўным аналізам сітуацыі. Ва ўсіх рэгіёнах зменшылася колькасць шпіталізацый пацыентаў з пнеўманіямі і колькасць новых хворых таксама крыху знізілася. Але нам ні ў якім разе нельга расслабіцца: так, лячэнне, рэабілітацыя - прызначэнне сістэмы аховы здароўя, а прафілактыка - гэта сумесная работа ўсіх людзей. Вакцынацыя - гэта найважнейшы кампанент, і радасна, што ў нас усё больш і больш прышчэпленых людзей", - адзначыў міністр.
Паводле яго слоў, ужо амаль 2,9 млн беларусаў атрымалі хаця б адзін кампанент вакцыны. "У абароце цяпер знаходзіцца мільён доз першых кампанентаў розных вакцын, таксама мы плануем атрымаць яшчэ пастаўку. Такім чынам, мяркую, што да заканчэння гэтага года мы будзем мець лічбу 5 млн вакцынаваных. Гэта дасць магчымасць нам спыніць эпідпрацэс. Што датычыцца кітайскай вакцыны, яна цяпер у большай ступені накіравана на прышчэпліванне цяжарных і кормячых маці. Яна ёсць, накіравана ў рэгіёны. Праблем з кітайскай вакцынай няма", - сказаў Дзмітрый Піневіч.
Міністр нагадаў, што разумнае дыстанцыраванне і нашэнне масак - таксама элемент аховы.-0-
