Сцяг Пятніца, 29 сакавіка 2024
Усе навіны
Усе навіны
Грамадства
03 сакавіка 2021, 17:55

Петрышэнка: ВНУ павінны рыхтаваць спецыялістаў розных галін і выхоўваць моладзь

3 сакавіка, Магілёў /Кар. БЕЛТА/. ВНУ павінны рыхтаваць адукаваных спецыялістаў розных галін і займацца выхаваннем моладзі. Такім меркаваннем з журналістамі падзяліўся намеснік прэм'ер-міністра Ігар Петрышэнка падчас наведвання Беларуска-Расійскага ўніверсітэта ў Магілёве, перадае карэспандэнт БЕЛТА.

"Задача перад ВНУ стаіць не толькі ў тым, каб даць добрыя веды, але і падрыхтаваць чалавека, грамадзяніна і патрыёта. Гэта работа заключаецца не толькі ў тым, каб выкладаць той ці іншы прадмет, але і, самае галоўнае, усебакова развіваць нашу моладзь. Сюды ўваходзіць і фізічная падрыхтоўка, павінна быць планавая і правільная арганізацыя гэтага працэсу. Нашы студэнты павінны рэалізоўваць свае творчыя здольнасці, маладыя людзі павінны прымаць актыўны ўдзел і ў грамадскім жыцці ВНУ. Не толькі выкладчыкі фарміруюць ВНУ, але і студэнты ўдзельнічаюць у гэтым. Яны фарміруюць традыцыі. Вельмі важна, што ў кожным універсітэце ёсць свае традыцыі, ёсць прадметны і ўзаемапаважлівы дыялог паміж прафесарска-выкладчыцкім складам і студэнтамі. Гэтыя традыцыі павінны развівацца, дапаўняцца новымі фарматамі", - адзначыў Ігар Петрышэнка.

Беларуска-Расійскі ўніверсітэт у Магілёве рыхтуе спецыялістаў па беларускіх і расійскіх адукацыйных праграмах. Ёсць 21 спецыяльнасць першай ступені, 7 спецыяльнасцей другой ступені вышэйшай адукацыі па беларускіх адукацыйных праграмах; 10 напрамкаў падрыхтоўкі бакалаўраў і 3 напрамкі падрыхтоўкі магістраў па расійскіх праграмах. Тут навучаюцца амаль 5 тыс. студэнтаў. "БРУ - асаблівая ВНУ, у гэтым годзе ён адзначае свой 60-гадовы юбілей. Гэта першы такі праект, рэалізуемы ў беларуска-расійскай адукацыйнай прасторы, які рыхтуе ў тым ліку спецыялістаў інжынернага профілю. Мы бачылі сёння распрацоўкі, якія выкарыстоўваліся ў будаўніцтве атамнай электрастанцыі ў Астраўцы. Вельмі прыемна, што студэнцкія атрады прымалі ўдзел у будаўніцтве АЭС. Тут ёсць шэраг распрацовак, якія ўкараняюцца ў прамысловую сферу на такіх гігантах, як БЕЛАЗ. ВНУ ідзе ў нагу з часам і рыхтуе спецыялістаў пад патрэбнасці нашай краіны і эканомікі", - падкрэсліў віцэ-прэм'ер.

Паводле слоў рэктара ўніверсітэта Міхаіла Лусцянкова, за апошнія два гады ў ВНУ з'явіліся 8 новых напрамкаў па беларускіх і расійскіх адукацыйных стандартах. "Наша ВНУ развіваецца. Гэта адпавядае пасылам, якія гучалі на VI Усебеларускім народным сходзе. Так, адным з тэзісаў на УНС было павышэнне якасці адукацыі. У прыватнасці, адкрываем новыя спецыяльнасці. Акрамя таго, нашы лабараторыі аснашчаюцца самым сучасным абсталяваннем. Мы рыхтуем спецыялістаў у галінах машынабудавання, будаўніцтва, энергетыкі, IT-тэхналогій. Таксама актыўна ўзаемадзейнічаем з навуковымі і адукацыйнымі арганізацыямі Расійскай Федэрацыі. У нас заключана больш за 100 міжнародных дагавораў. З іх больш за 60 - з ВНУ Расійскай Федэрацыі, 20 - менавіта за апошнія некалькі гадоў, - адзначыў Міхаіл Лусцянкоў. - Удзельнічаем у эксперыментальным праекце "Універсітэт 3.0", рыхтуем рыначна арыентаваных спецыялістаў, якія могуць не толькі распрацоўваць і прапаноўваць ноу-хау, але і рэалізоўваць на практыцы. Усе студэнты ВНУ працаўладкоўваюцца, нават тыя, хто атрымлівае адукацыю на платнай аснове, калі хочуць атрымаць першае месца работы. Спецыяльнасці машынабудаўнічага профілю, напрыклад, цяпер запатрабаваны: на аднаго студэнта прыпадае часам па дзве-тры заяўкі. Можам гаварыць пра 100%-ае працаўладкаванне нашых выпускнікоў".

Паступова Беларуска-Расійскі ўніверсітэт асвойвае гуманітарныя напрамкі. "Мы плануем і далей пашыраць пералік спецыяльнасцей, асабліва такіх, якія звязаны з высокатэхналагічнымі галінамі прамысловасці. Дарэчы, адыходзім ад канцэпцыі профільнага тэхнічнага ўніверсітэта. Напрыклад, адкрылі спецыяльнасць "замежнае рэгіёназнаўства", у мінулым годзе ажыццявілі першы набор. Гэта напрамак гуманітарнага плана. Адкрываем і спецыяльнасці фізіка-матэматычнага напрамку. Рыхтуем дакументы на спецыяльнасці "геадэзія", "нафтагазавая справа". У цэлым стараемся прадаставіць абітурыентам шырокі выбар. За апошнія пяць гадоў развіцця нашай ВНУ адкрыта больш спецыяльнасцей, чым за ўвесь час яе існавання, - падкрэсліў рэктар. - Час патрабуе дынамічнага развіцця: мы павінны адпавядаць сучасным запатрабаванням. Тэхналогіі, якія былі актуальны на першым курсе, на чацвёртым ужо могуць устарэць. Таму менавіта пералік новых спецыяльнасцей і напрамкаў падрыхтоўкі прызначаны адказаць на гэтыя выклікі. Развіваем такія напрамкі, якія, здавалася, страчваюць актуальнасць, паколькі рынак перанасычаны. Напрыклад, эканамічны профіль. Калі эканаміст атрымлівае кваліфікацыю ў сферы інфармацыйна-камунікацыйных тэхналогій, становіцца больш запатрабаваным. Спынілі набор на спецыяльнасць "маркетынг", але адкрылі на "электронны маркетынг" - гэта тое, што адпавядае часу".

Ігар Петрышэнка азнаёміўся з тэхнічнай базай ВНУ, размова ішла аб удасканаленні прыёму абітурыентаў і якасці падрыхтоўкі спецыялістаў. "Сёння мы абмяркоўвалі з рэктарскім складам, якія яшчэ ёсць рэзервы для таго, каб і адукацыйныя стандарты павышаць, і ўдасканальваць прыём студэнтаў. Калі таленавітае дзіця, абітурыент паўдзельнічаў у профільнай алімпіядзе і перамог, ён павінен па пэўных ільготах, можа і без уступных экзаменаў, паступаць у ВНУ. Бо ён ужо на алімпіядзе вытрымаў гэты экзамен, адчуў хваляванне і паказаў свае здольнасці, - адзначыў Ігар Петрышэнка. - З 1 студзеня гэтага года мы ажыццявілі першы набор у дзіцячы тэхнапарк у Мінску. І мы плануем, што падрыхтоўка нашых дзяцей па тэхнічных спецыяльнасцях дасць магчымасць на адпаведныя спецыяльнасці ў тэхнічныя ВНУ краіны паступаць без конкурснага адбору. Узнімаліся пытанні навучання ў магістратуры, папаўненне прафесарска-выкладчыцкага складу маладымі вучонымі. Яны павінны і самі рыхтавацца, і вучыць наступныя пакаленні студэнтаў. Акрамя таго, ВНУ павінна адсочваць сваіх выпускнікоў, як яны рэалізаваліся ў жыцці, на першым працоўным месцы. Можа, іх недавучылі, недавыхавалі - калі ёсць такі недахоп, над ім трэба папрацаваць. Гэта зона адказнасці і ВНУ, і калектыву, у які выпускнік прыйшоў працаваць. Вось гэтыя ўсе моманты дадуць магчымасць актыўна ўключаць моладзь у стваральны працэс уласнай падрыхтоўкі і стымуляваць яе ўносіць уклад у развіццё краіны".

У актавай зале вучэбнага корпуса прайшла сустрэча з прафесарска-выкладчыцкім складам і студэнцкім актывам Беларуска-Расійскага ўніверсітэта. Ігар Петрышэнка расказаў аб ключавых аспектах развіцця краіны, якія абмяркоўваліся на VI Усебеларускім народным сходзе. Акцэнт быў зроблены на маладзёжнай палітыцы, адукацыі і захаванні сацыяльных гарантый.-0-

Падпісвайцеся на нас у
Twitter
Топ-навіны
Свежыя навіны Беларусі