Сцяг Пятніца, 29 сакавіка 2024
Усе навіны
Усе навіны
Грамадства
23 верасня 2021, 16:06

Петрышэнка: у Беларусі сярод краін СНД самы нізкі паказчык дзіцячай смяротнасці

23 верасня, Мінск /Кар. БЕЛТА/. У Беларусі сярод краін СНД самы нізкі паказчык дзіцячай смяротнасці. Аб гэтым заявіў намеснік прэм'ер-міністра Ігар Петрышэнка сёння на пасяджэнні Нацыянальнай камісіі па правах дзіцяці, перадае карэспандэнт БЕЛТА.

Сёння на пасяджэнні Нацкамісіі па правах дзіцяці будуць падведзены вынікі рэалізацыі нацыянальнага плана дзеянняў па паляпшэнні становішча дзяцей і ахове іх правоў на 2016-2021 гады. "Рэалізацыя мерапрыемстваў нацыянальнага плана дзеянняў дала магчымасць значна ўдасканаліць умовы для жыцця і развіцця дзяцей. Ёсць пазітыўныя вынікі. Напрыклад, у Беларусі сярод усіх краін СНД самы нізкі паказчык дзіцячай смяротнасці. Ён таксама ніжэйшы, чым у многіх развітых дзяржаў, уключаючы Вялікабрытанію, Данію, Літву, Польшчу, ЗША. У 2020 годзе каэфіцыент дзіцячай смяротнасці склаў 2,6 на 1 тыс. народжаных жывымі, з улікам дзяцей, якія нарадзіліся з экстрэмальна нізкай масай цела. У той час як у 2015 годзе ён быў 3,0", - сказаў Ігар Петрышэнка.

Паводле яго слоў, у краіне практычна вырашана задача забяспечанасці дзяцей месцамі ў дашкольных установах. "Ахоп дзяцей ва ўзросце ад года да 6 гадоў павялічыўся з 75 працэнтаў у 2016 годзе да 85,2 працэнта ў 2020 годзе. Пры гэтым у мінулым годзе ахоп дзяцей ва ўзросце ад 3 да 6 гадоў такімі ўстановамі склаў 100 працэнтаў", - расказаў віцэ-прэм'ер.

За час рэалізацыі нацыянальнага плана дзеянняў атрымалі развіццё сістэмы паліятыўнай медыцынскай дапамогі дзецям і сацыяльнага патранату сем'яў, якія апынуліся ў цяжкай жыццёвай сітуацыі. "Дасягнуты пэўныя вынікі па рэалізацыі права дзіцяці жыць і выхоўвацца ў сям'і. Напрыклад, удзельная вага дзяцей-сірот і дзяцей без апекі бацькоў, якія знаходзяцца на сямейных формах уладкавання, вырасла з 78 працэнтаў у 2015 годзе да 83,4 працэнта ў 2020 годзе. Спадзяёмся, што і далей прадоўжым нарошчваць гэты паказчык", - растлумачыў намеснік прэм'ер-міністра. Ён адзначыў, што развіваецца сетка дзіцячых дамоў сямейнага тыпу. У 2020 годзе адкрыта 15 такіх дзіцячых дамоў сямейнага тыпу, на выхаванне ў якія перададзена 136 дзяцей, у тым ліку 124 дзіцяці (91 працэнт) з дзіцячых інтэрнатных устаноў.

"У той жа час па-ранейшаму актуальны задачы, звязаныя з павышэннем якасці адукацыі, медыцыны і сацыяльнай дапамогі, развіццём інклюзіі, фарміраваннем у дзяцей і моладзі ўстойлівай патрэбнасці ў здаровым ладзе жыцця. Патрабуе ўдасканалення работа па абароне дзяцей ад насілля, у тым ліку сямейнага, абмежаванні іх ад дэструктыўнай і іншай негатыўнай інфармацыі. Вырашэнне гэтых праблем магчыма толькі пры комплексным і грунтоўным міжведамасным падыходзе. Адпаведныя меры павінны быць уключаны ў нацыянальны план дзеянняў па паляпшэнні становішча дзяцей і ахове іх правоў на наступныя пяць гадоў", - звярнуў увагу Ігар Петрышэнка.

Яшчэ адно пытанне, якое будзе разгледжана сёння на пасяджэнні, - удасканаленне міжведамаснага ўзаемадзеяння па пытаннях прафілактыкі суіцыданебяспечных паводзін непаўналетніх. "У камісіі выклікае занепакоенасць, што ў Беларусі дзейнічае цэлая сістэма мер, накіраваных на прафілактыку суіцыдаў сярод непаўналетніх, але належнага выніку, на жаль, пакуль дасягнуць не ўдалося. Гэта пацвярджае і статыстыка. Кожны факт суіцыду - гэта трагедыя, незаменная страта, якая здараецца ў першую чаргу па віне дарослых, - своечасова не ўбачылі сямейнага недабрабыту, не аказалі сацыяльна-педагагічнай падтрымкі, псіхалагічнай, медыцынскай дапамогі, не зрэагавалі на асацыяльныя паводзіны дзіцяці. Гэта часта сведчыць аб фармальным падыходзе ў вырашэнні гэтай задачы. Як забяспечыць дзейсную прафілактыку суіцыдальных паводзін падлеткаў, палепшыць міжведамаснае ўзаемадзеянне ў гэтай рабоце - мы сёння такія тэмы абмяркуем", - дадаў віцэ-прэм'ер.-0-

Фота Андрэя Пакумейкі

Падпісвайцеся на нас у
Twitter
Топ-навіны
Свежыя навіны Беларусі