7 лютага, Мінск /Кар. БЕЛТА/. Першыя сімптомы каранавіруснай інфекцыі могуць заўважыць стаматолагі, паведаміла доктар медыцынскіх навук, прафесар 3-й кафедры тэрапеўтычнай стаматалогіі Беларускага дзяржаўнага медыцынскага ўніверсітэта Юлія Дзянісава на прэс-канферэнцыі, прымеркаванай да Міжнароднага дня стаматолага (9 лютага), перадае карэспандэнт БЕЛТА.
"Першыя сімптомы каранавіруснай інфекцыі могуць праявіцца ў роце. І стаматолагі могуць быць першымі спецыялістамі, якія гэта здольны выявіць", - сказала Юлія Дзянісава.
Яна растлумачыла: размова ідзе аб змяненні слізістай, розных утварэннях, у тым ліку афтах, язвачках, налёце на языку, кандыдозе або грыбковых пашкоджаннях і многіх іншых праявах у ротавай поласці. "Таму нельга забываць, што ў перыяд хваробы і пасля яе заканчэння неабходна праводзіць гігіенічныя мерапрыемствы. Рэгулярна, раз у 12 гадзін - раніцай і ўвечары - чысціць зубы не менш за 2 мінуты, чысціць трэба і язык спецыяльнымі сродкамі ў выглядзе скрабка для языка або спецыяльнай шчоткі", - адзначыла доктар.
Яна падкрэсліла, што перыяд пасля каранавіруснай інфекцыі не з'яўляецца проціпаказаннем да стаматалагічных маніпуляцый, аднак яна можа выклікаць абвастрэнне хранічных захворванняў, якія ёсць у пацыента.-0-
