Павучыцца ў прафесіяналаў. Якія профільныя лагеры для дзяцей будуць працаваць у гэтым годзе

8 мая, Мінск /Кар. БЕЛТА/. Дырэктар Нацыянальнага дзіцячага адукацыйна-аздараўленчага цэнтра "Зубраня" Таццяна Асмалоўская расказала ў праекце БЕЛТА "Краіна гаворыць" аб тым, якія профільныя лагеры для дзяцей будуць працаваць у гэтым годзе.

Што датычыцца праграмы ў цэлым, то ў "Зубраняці" ўдзеляць вялікую ўвагу двум фактарам: бяспецы і цікаваму адпачынку з карысцю. "Таму праграмы разнастайныя. Дзесьці ёсць профільныя праграмы - для юных фізікаў, для юных хімікаў - дзяцей, якія займаюцца тэхнічнай творчасцю. Вядома, будуць і проста агульнадаступныя забаўляльныя праграмы", - расказала Таццяна Асмалоўская.

Як правіла, майстар-класы або навучальныя мерапрыемствы праводзяць тыя педагогі, з якімі ўжо заключаны прафесійныя адносіны і пагадненні паміж установамі. "Мы працуем з БДУ, і на гэтыя профільныя змены прыязджаюць выкладчыкі ўніверсітэта. Дзеці ў "Зубраняці", з'яўляючыся пераможцамі разнастайных алімпіяд, могуць павучыцца ў прафесараў і прафесіяналаў сваёй справы, - адзначыла яна. - Спецыялісты могуць прыязджаць і на некалькі дзён, але профіль адпрацоўваецца на працягу ўсёй змены ў поўнай меры".

Намеснік дырэктара Рэспубліканскага цэнтра па аздараўленні і санаторна-курортным лячэнні насельніцтва Аляксандр Цай дадаў, што задзейнічаны ў профільных лагерах таксама педагогі дадатковай адукацыі, якія гэту работу наладжваюць.

"Ствараюцца наогул лагеры для высокаматываваных дзяцей для поўнай іх занятасці і па інтарэсах. Такія лагеры існуюць на працягу апошніх двух гадоў. Яны толькі ўдасканальваюцца, але сёння ўжо няма такіх дзяцей, якія скажуць бацькам, што яны не ведалі, чым заняцца ў лагеры", - рэзюмаваў ён.

*Праект створаны за кошт сродкаў мэтавага збору на вытворчасць нацыянальнага кантэнту.-0-