14 жніўня, Масква /Эдуард Півавар - БЕЛТА/. Пасольства Беларусі ў РФ на сваім сайце адказала на шматлікія звароты наконт чэргаў, якія ўтварыліся 9 жніўня ў дзень выбараў Прэзідэнта на выбарчых участках у Расіі, паведамляе БЕЛТА.
"У адказ на масавыя звароты ад розных заяўнікаў аналагічнага зместу наконт чэргаў, што ўзніклі ў дзень выбараў 9 жніўня на замежных участках для галасавання, у сувязі з чым не ўсе выбаршчыкі паспелі прагаласаваць, паведамляем наступнае. Участкі для галасавання ў Маскве, Санкт-Пецярбургу, Калінінградзе, таксама як і ўчастковыя камісіі гэтых участкаў, створаны ў парадку, прадугледжаным артыкуламі 18, 34, 35 Выбарчага кодэкса Беларусі і зыходзячы са спісаў грамадзян Рэспублікі Беларусь, якія прымалі ўдзел у мінулых выбарах і знаходзяцца на консульскім уліку ў загранустановах, на аснове якіх складаліся спісы грамадзян, што маюць права ўдзельнічаць у выбарах", - адзначылі ў дыпмісіі.
"З улікам павышэння інтарэсу да выбараў у выбаршчыкаў за мяжой і адначасовага зніжэння прапускной здольнасці ўчасткаў у сувязі з мерамі па прафілактыцы каранавіруснай інфекцыі на сайце пасольства загадзя быў апублікаваны заклік актыўней галасаваць у дні датэрміновага галасавання, - нагадваецца ў паведамленні. - Асабліва просьба датычылася выбаршчыкаў, якія не знаходзяцца на консульскім уліку і адпаведна не ўключаны ў спісы выбаршчыкаў. Працэдура ўнясення грамадзяніна ў спіс выбаршчыкаў замежнага ўчастка для галасавання і выключэння яго са спіса выбаршчыкаў участка для галасавання па месцы рэгістрацыі ў Беларусі патрабавала дадатковага часу".
У пасольстве падкрэслілі, што закрыццё ўчасткаў для галасавання ў 20 гадзін 9 жніўня поўнасцю адпавядае заканадаўству (частка першая артыкула 50 Выбарчага кодэкса).
"Пасля падліку галасоў і складання пратаколаў аб выніках галасавання ўчастковыя камісіі ў Маскве, Санкт-Пецярбургу і Калінінградзе завяршылі сваю дзейнасць і спынілі існаванне, - адзначылі ў дыпмісіі. - У сувязі з гэтым звароты ў загранустановы па пытаннях, якія датычацца дзейнасці ўчастковых выбарчых камісій, не маюць пад сабой падстаў. Пры гэтым вопыт правядзення выбараў Прэзідэнта Рэспублікі Беларусь у 2020 годзе будзе ўлічаны пры арганізацыі галасавання за мяжой у будучым".
У пасольстве адзначылі, што цяпер тлумачэнні заканадаўства Беларусі аб выбарах дае Цэнтрвыбаркам. "Пазіцыя Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў па сутнасці зваротаў такога зместу выкладзена ў адказах ад 12.08.2020 і ад 07.08.2020. З тэкстамі адказаў можна азнаёміцца на сайце Цэнтрвыбаркама", - дадалі ў дыпмісіі.-0-
