20 снежня, Мінск /Кар. БЕЛТА/. Член Савета Рэспублікі Аляксей Нявераў назваў правакацыяй заклікі апазіцыі да ўдзелу ў несанкцыянаваных акцыях супраць беларуска-расійскай інтэграцыі. Аб гэтым сенатар заявіў карэспандэнту БЕЛТА.
"Маё меркаванне: усе гэтыя заклікі выйсці на плошчу - проста правакацыя", - падкрэсліў ён. Аляксей Нявераў звярнуў увагу, што арганізатары выкарыстоўваюць надуманыя падставы, выдуманыя пагрозы аб страце суверэнітэту. "На самай справе, на перагаворах аб паглыбленні беларуска-расійскай інтэграцыі размова ідзе аб эканоміцы. Ніхто не гаворыць аб палітыцы і тым больш магчымасці зліцця дзвюх краін", - адзначыў парламентарый.
"У пераднавагодні час спрабаваць бударажыць людзей і вывесці іх на вуліцы, ды яшчэ туды, дзе праводзяцца дзіцячыя святы, падвяргаючы небяспецы дзяцей... Той, хто арганізуе такія акцыі, павінен у поўнай меры несці адказнасць за такія заклікі", - лічыць сенатар.
Старшыня Пастаяннай камісіі Палаты прадстаўнікоў па міжнародных справах Андрэй Савіных таксама перакананы, што на справе акцыі не маюць ніякага дачынення непасрэдна да інтэграцыйнага працэсу і перагавораў паміж Расіяй і Беларуссю. Арганізатары маюць свае вузкія інтарэсы. "Усе гэтыя акцыі ні ў якай меры не адлюстроўваюць пазіцыі народа, краіны і праводзяцца маргінальнымі грамадскімі аб'яднаннямі, калі, вядома, іх можна назваць грамадскімі", - зрабіў агаворку парламентарый.-0-
