14 жніўня, Мінск /Кар. БЕЛТА/. У Беларусі прадоўжыцца нарошчванне тэмпаў жыллёвага будаўніцтва. Аб гэтым заявіў журналістам міністр архітэктуры і будаўніцтва Руслан Пархамовіч па выніках нарады ў кіраўніка дзяржавы па актуальных пытаннях функцыянавання і павышэння эфектыўнасці будаўнічай галіны, перадае карэспандэнт БЕЛТА.
Міністр праінфармаваў, што Прэзідэнт падтрымаў прапановы Мінбудархітэктуры ў частцы будаўніцтва жылля. "Былі падтрыманы падыходы ў частцы нарошчвання тэмпаў будаўніцтва жылля для шматдзетных сем'яў і грамадзян, маючых патрэбу ў паляпшэнні жыллёвых умоў", - сказаў Руслан Пархамовіч.
Паводле яго слоў, у бліжэйшыя 5 гадоў плануецца паэтапнае павелічэнне аб'ёмаў жыллёвага будаўніцтва. Гэта датычыцца таксама ўзвядзення арэнднага жылля і жылля з выкарыстаннем электрычнай энергіі для ацяплення, гарачага водазабеспячэння і гатавання ежы.
Для таго каб пашырыць магчымасці грамадзян на набыццё жылля, падрыхтаваны праект указа "Аб дзяржаўнай сістэме жыллёвых будаўнічых зберажэнняў". Дакумент у бліжэйшы час будзе прадстаўлены на разгляд кіраўніку дзяржавы.-0-
