Сцяг Аўторак, 23 ліпеня 2024
Усе навіны
Усе навіны
Грамадства
12 чэрвеня 2024, 14:11

Паняцце "беларускі свет" уводзіцца ў абарот. Гусакоў пра яго значэнне

Уладзімір Гусакоў. Фота з архіва
Уладзімір Гусакоў. Фота з архіва
12 чэрвеня, Мінск /Кар. БЕЛТА/. У абарот уводзіцца такое паняцце, як "беларускі свет", паведаміў старшыня Прэзідыума Нацыянальнай акадэміі навук Беларусі акадэмік Уладзімір Гусакоў на маладзёжным навуковым форуме "Беларускі свет: погляд навукі і праваслаўя", перадае карэспандэнт БЕЛТА.

"Трэба асабліва падкрэсліць, што сёння мы ўводзім у абарот такое абагульняючае для ўсёй нашай гуманітарыстыкі паняцце, як "беларускі свет", загадзя сцвярджаючы, што яно ўбірае ў сябе цэлую сістэму агульнанацыянальных каштоўнасцей - ад старажытнай гісторыі і культуры да сучаснага светаўладкавання, уключаючы традыцыйны светапогляд нашага народа", - сказаў Уладзімір Гусакоў.

Старшыня Прэзідыума НАН адзначыў, што гістарычны шлях Беларусі мае выключныя асаблівасці. Ён звярнуў увагу, па-першае, на геаграфічнае становішча, якое на працягу стагоддзяў было скрыжаваннем некалькіх культур і дзяржаўных утварэнняў, якія ўваходзяць у вялікія цывілізацыйныя кангламерацыі і вызначаюць развіццё еўразійскай прасторы. Па-другое, указаў на асаблівасці насельніцтва беларускіх тэрыторый, якое стагоддзямі ўбірала ў свой склад прадстаўнікоў розных этнасаў і нацыянальнасцей. Па-трэцяе, звярнуў увагу на набытую з цягам часу высокую ступень устойлівасці беларускага народа да разбуральных умоў транзітнага існавання.

Уладзімір Гусакоў заўважыў, што дзякуючы гэтым і іншым фактарам на беларускай тэрыторыі склаліся ўнікальныя ўмовы для фарміравання поліэтнічнага, полікультурнага і поліканфесійнага грамадства, дзяржавы з высокаразвітой навукай, эканомікай, культурай, сістэмай міжнародных адносін - таго, што, дарэчы, варта назваць беларускім светам.

"Сёння беларускі свет - не толькі традыцыі слаўнага мінулага, але і дастойная рэчаіснасць, упэўненыя пазіцыі ў галіне навукі, культуры, адукацыі, аховы здароўя, міжнароднага супрацоўніцтва, абараназдольнасці, што пераканаўча пацвярджаецца як паўсядзённым вопытам беларускіх грамадзян і нашых гасцей, так і статыстычнымі паказчыкамі і высокімі пазіцыямі ў міжнародных рэйтынгах, - сказаў ён. - Захоўваючы спадчыну продкаў, моцным бокам беларускага свету застаецца імкненне да кантактаў са знешнім асяроддзем, гатоўнасць успрымаць новы вопыт і пераймаць лепшыя ўзоры".

Старшыня Прэзідыума НАН звярнуўся да прамовы Прэзідэнта краіны Аляксандра Лукашэнкі, які ў сваім выступленні на пасяджэнні сёмага Усебеларускага народнага сходу адзначыў, што беларусы не адмаўляюць прагрэсіўныя формы, а інтэгруюць "у свой палітычны лад, у сваю культуру, у свой светапогляд, калі яны не супярэчаць нашым прынцыпам і каштоўнасцям".

Пры гэтым Уладзімір Гусакоў лічыць важным, каб беларускі свет атрымаў сістэмнае асэнсаванне і заняў дастойнае месца ў вялікім і неспакойным сучасным глабальным свеце, адкрыта і аргументавана інтэрпрэтаваў гістарычную праўду і адлюстроўваў нацыянальныя інтарэсы беларусаў.

Паводле яго слоў, абмеркаванне гэтай тэматыкі на маладзёжным форуме павінна не толькі актуалізаваць і папулярызаваць існуючыя дасягненні Беларусі, але і задаць арыенціры разумення будучага ў складанай палітры цывілізацыйнага развіцця. Гэта своеасаблівая выпрацоўка і апрабацыя беларускай нацыянальнай ідэі на сучасным этапе развіцця беларускага грамадства і дзяржавы, адзначыў ён.-0-
Падпісвайцеся на нас у
Twitter
Топ-навіны
Свежыя навіны Беларусі