15 снежня, Гомель /Кар. БЕЛТА/. Памятную дошку Герою Савецкага Саюза Мікалаю Зябніцкаму адкрылі сёння ў Гомелі на фасадзе дома на праспекце Перамогі, дзе жыў камандзір дзеючага ў гады Вялікай Айчыннай вайны партызанскага атрада спецыяльнага прызначэння імя Ф.Э. Дзяржынскага, перадае карэспандэнт БЕЛТА.
"Сёння ў нашым слаўным горадзе, які шануе і беражліва захоўвае гісторыю, напоўненую гераічнымі і працоўнымі подзвігамі, з'явіцца яшчэ адно памятнае месца - у гонар легендарнага чалавека, удзельніка абарончых баёў і партызанскай барацьбы, аднаго з арганізатараў партызанскага руху на тэрыторыі Беларусі, Героя Савецкага Саюза Мікалая Васільевіча Зябніцкага", - адзначыў на цырымоніі адкрыцця старшыня Гомельскага аблвыканкама Іван Крупко.
У верасні 1941 года ў складзе спецатрада Мікалай Зябніцкі ў свае амаль 22 гады пайшоў за лінію фронту. "Амаль два гады спачатку ўзвод, а пазней атрад пад камандаваннем смелага і рашучага камандзіра выконваў заданні ў тыле ворага на тэрыторыі Магілёўскай, Палескай і Гомельскай абласцей", - звярнуўся да гісторыі губернатар.
Пасля вайны Мікалай Зябніцкі прадоўжыў службу ў органах дзяржаўнай бяспекі ў Гомельскай вобласці.
На радзіме героя, у далёкім казахскім горадзе Тайынша яго імем названа вуліца, дадаў Іван Крупко.
Ён звярнуў увагу, што аб'яўлены Годам гістарычнай памяці 2022-і падштурхнуў многіх больш дэталёва вывучыць біяграфіі членаў сваіх сем'яў, а праз іх і гісторыю сваёй краіны, звярнуцца ў архівы з жаданнем як мага больш даведацца аб ваенным ліхалецці і пасляваенных гадах аднаўлення. "Вывучалі, успаміналі, даведваліся і адкрывалі помнікі і мемарыялы. Такія як гістарычны комплекс "Партызанская крынічка" ў Гомельскім раёне, як памятны знак на будынку чыгуначнага вакзала ў Калінкавічах у гонар 27 патрыётаў-чыгуначнікаў, якія ў гады вайны пад камандаваннем лейтэнанта НКДБ Пятра Ануфрыева здабывалі бясцэнную разведвальную інфармацыю, удзельнічалі ў знішчэнні сіл і рэсурсаў праціўніка. У гонар унікальнай спецаперацыі, якую правёў у Жлобінскім раёне атрад "Храбрацы", устаноўлена мемарыяльная дошка на станцыі Чырвоны Бераг", - прывёў прыклады губернатар.
"Сёння на нашай зямлі вядуцца работы па пошуку і ўстанаўленні загінулых абаронцаў Радзімы. І гэта работа будзе прадаўжацца да таго часу, пакуль з ушанаваннямі не перапахаваюць усіх бязвінных ахвяр вайны і салдат, якія загінулі за Перамогу", - запэўніў ён.
Начальнік упраўлення Камітэта дзяржаўнай бяспекі па Гомельскай вобласці Аляксандр Мельнікаў адзначыў, што біяграфія Мікалая Зябніцкага ў многім падобная на жыццёвы шлях яго равеснікаў - прадстаўнікоў савецкай моладзі 30-40-х гадоў мінулага стагоддзя, чый жыццёвы выбар быў прадыктаваны імкненнем сумленна і аддана служыць сваёй Радзіме, гатоўнасцю паўстаць на яе абарону, калі неабходна - аддаць за яе жыццё.
"У неймаверна цяжкіх умовах Мікалай Зябніцкі і яго таварышы па зброі здабывалі Перамогу, верылі, што вораг будзе разбіты, і фашысцкі бот больш ніколі не ступіць на нашу родную зямлю", - сказаў Аляксандр Мельнікаў.
"Мы цвёрда перакананы, што імёны герояў і гераічныя старонкі іх біяграфій павінны быць увекавечаны. На працягу некалькіх гадоў па ініцыятыве Гомельскага ўпраўлення КДБ адкрыты мемарыяльныя і памятныя дошкі ў гонар супрацоўнікаў органаў дзяржбяспекі ў Гомелі, Мазыры, Рэчыцы, Петрыкаве, Калінкавічах. І мы будзем прадаўжаць гэту работу. Каб у першую чаргу моладзь бачыла рэальныя прыклады мужнасці, гераізму і патрыятызму, ведала аб такіх унікальных і самаадданых людзях, як Мікалай Васільевіч Зябніцкі", - рэзюмаваў Аляксандр Мельнікаў.
Пасля мінуты маўчання ўдзельнікі цырымоніі да памятнай дошкі ўсклалі кветкі.-0-
