22 красавіка, Мінск /Кар. БЕЛТА/. З 22 красавіка паязды з Калінінграда будуць рабіць дадатковыя прыпынкі на тэрыторыі Беларусі, паведамілі БЕЛТА ў прэс-цэнтры Беларускай чыгункі.
Уводзяцца дадатковыя прыпынкі для пасадкі і высадкі пасажыраў на тэрыторыі Беларусі для транзітных паяздоў нумар 30/29 Калінінград - Масква - па станцыях Смаргонь і Маладзечна з магчымасцю праезду пасажыраў на ўчастках Маладзечна - Масква і Масква - Смаргонь, нумар 80/79 Калінінград - Санкт-Пецярбург - па станцыях Смаргонь, Маладзечна, Круляўшчызна, Полацк, Шуміліна з магчымасцю праезду пасажыраў на ўчастку Смаргонь - Санкт-Пецярбург - Смаргонь. Таксама дадатковыя прыпынкі ўводзяцца для поезда нумар 360/359 Калінінград - Адлер - па станцыях Смаргонь, Маладзечна, Барысаў з магчымасцю праезду пасажыраў на ўчастку Смаргонь - Адлер - Смаргонь.
БЧ звяртае ўвагу, што ажыццяўленне праезду названымі паяздамі прадугледжана толькі для грамадзян Беларусі і Расійскай Федэрацыі.
Таксама ў прэс-цэнтры нагадалі, што грамадзяне Беларусі пры ўездзе на тэрыторыю Расіі абавязаны мець даведку адносна каранавіруснай інфекцыі з адмоўным вынікам лабараторнага абследавання метадам ПЛР, выдадзеную не пазней як за тры дні да даты пачатку паездкі. Выключэнне складаюць дзеці ва ўзросце да 5 гадоў (пры наяўнасці даведкі ў суправаджаючых асоб), члены ўрадавых дэлегацый дзяржаў - членаў ЕАЭС пры вяртанні ў краіну грамадзянства, члены лакаматыўных брыгад і асобы, звязаныя з перавозачнай дзейнасцю на чыгуначным транспарце.
Грамадзяне РФ, якія вяртаюцца ў Расію з-за мяжы чыгуначным транспартам, павінны запоўніць анкету на Адзіным партале дзяржаўных і муніцыпальных паслуг да прыбыцця на тэрыторыю Расійскай Федэрацыі, а пасля прыбыцця - прайсці на працягу трох каляндарных дзён лабараторнае даследаванне на COVID-19 метадам ПЛР і размясціць вынік на АПДП. Да атрымання вынікаў абавязкова выкананне рэжыму ізаляцыі па месцы жыхарства (знаходжання).
Пры накіраванні ў Беларусь замежныя грамадзяне, якія дасягнулі шасцігадовага ўзросту, за выключэннем маючых дазвол на пастаяннае або часовае пражыванне на беларускай тэрыторыі, таксама павінны мець названы вышэй медыцынскі дакумент, што пацвярджае адмоўны вынік ПЛР-тэста на COVID-19.
Больш падрабязную інфармацыю аб графіку руху гэтых паяздоў, правілах і кошце праезду можна атрымаць на сайце www.rw.by, у мабільным дадатку "БЧ. Мой поезд", а таксама па тэлефоне 105 кантакт-цэнтра БЧ.-0-
