14 лютага, Мінск /Аліна Грышкевіч - БЕЛТА/. Дзеянні Беларусі па падтрымцы Кітая ў барацьбе з каранавірусам адлюстроўваюць вялікую дружбу беларускага і кітайскага народаў. Аб гэтым сказаў у размове з карэспандэнтам БЕЛТА Надзвычайны і Паўнамоцны Пасол Кітая ў Беларусі Цуй Цымін.
"Кітай абавязкова пераможа эпідэмію пнеўманіі, што выклікана новым тыпам каранавіруса, - упэўнены дыпламат. - З пачатку года ў краіне адбылася ўспышка эпідэміі пнеўманіі, што выклікана новым тыпам каранавіруса. Сутыкнуўшыся з эпідэміяй, кітайскі народ пад кіраўніцтвам Старшыні Сі Цзіньпіна яшчэ больш з'яднаўся і ўсімі сіламі змагаецца з эпідэміяй. Кітайскі ўрад, займаючы ў вышэйшай ступені адказную пазіцыю ў адносінах да кітайскага народа і сусветнай супольнасці, прыняў нябачаныя па строгасці меры па прафілактыцы і барацьбе з эпідэміяй, максімальна перапыняючы распаўсюджванне эпідэміі і абараняючы бяспеку грамадскай аховы здароўя".
"Некалькі дзён таму ў размове са мной беларускія сябры назвалі важным той факт, што ўрад Кітая пабудаваў новую бальніцу ўмяшчальнасцю 1 тыс. ложкаў усяго за 10 дзён. Я адказаў, што гэта не толькі адлюстроўвае "хуткасць Кітая" ў часы крызісу, а таксама паказвае, што адзінства і рашучасць кітайскага ўрада і народа змагацца з эпідэміяй мацнейшыя, чым сталь, - адзначыў Цуй Цымін. - Цяпер прынятыя намі меры дасягнулі вынікаў. Колькасць пацыентаў, якія былі вылечаны ад пнеўманіі новага тыпу, значна перасягнула колькасць смяротных выпадкаў. Тэмпы росту мяркуемых выпадкаў захворвання запаволіліся".
Пасол звярнуў увагу, што, хоць эпідэмічная сітуацыя ўсё яшчэ застаецца цяжкай, урад і народ Кітая ўпэўнены ў тым, што змогуць перамагчы эпідэмію.
"Поспех або правал у барацьбе з эпідэміямі звязаны не толькі са здароўем і бяспекай кітайскага народа, але таксама са здароўем і бяспекай усяго свету. Пасля ўспышкі эпідэміі кітайскі ўрад адкрыта, празрыста і адказна падзяліўся і дзеліцца інфармацыяй з Сусветнай арганізацыяй аховы здароўя і іншымі краінамі свету, уключаючы Беларусь, і запрасіў адпаведных экспертаў з СААЗ і іншых арганізацый наведаць Ухань для работы на месцах. "Мы прынялі ўсебаковыя і строгія меры прафілактыкі і барацьбы з успышкай эпідэміі. Патрабаванні многіх мер значна перавышаюць патрабаванні рэкамендацый СААЗ і міжнародных медыка-санітарных правіл. Напрыклад, ва Ухані прыняты меры па закрыцці горада, каб спыніць распаўсюджванне віруса", - прадоўжыў кіраўнік дыпмісіі.
Ён канстатаваў, што па стане на 13 лютага ў свеце дыягнаставаны 492 новыя выпадкі захворвання пнеўманіяй, якая выклікана новым тыпам каранавіруса, што складае толькі 0,8 працэнта ад колькасці выпадкаў захворвання ў Кітаі ў гэты дзень. "Меры, прынятыя Кітаем, атрымалі шырокую падтрымку і высокую ацэнку з боку міжнароднай супольнасці. Генеральны дырэктар Сусветнай арганізацыі аховы здароўя Тэдрас Аданам Гебрэісус высока ацаніў меры па процістаянні эпідэміі. СААЗ неаднаразова падкрэслівала, што няма ніякіх прычын прымаць непатрэбныя абмежаванні на міжнародныя падарожжы і заклікала міжнародную супольнасць не верыць чуткам. Нядаўна Сусветная арганізацыя аховы здароўя таксама прысвоіла пнеўманіі, што выклікана новым тыпам каранавіруса, назву COVID-19, тым самым прадэманстраваўшы цвёрдую падтрымку міжнароднай супольнасці адносна мер, якія прымаюцца Кітаем, што рэзка кантрастуе з матэрыяламі некаторых СМІ, якія да гэтага часу называюць хваробу "Уханьскай пнеўманіяй" і "кітайскім каранавірусам", - падкрэсліў Цуй Цымін.
Ён выказаў надзею, што тыя СМІ, якія ўсё яшчэ выкарыстоўваюць няправільную назву хваробы, выправяць гэта як мага хутчэй. "Вядома, мы не маем намеру прымяншаць праблемы, выкліканыя эпідэміяй. І разам з тым мы таксама выказваем надзею на тое, што краіны ва ўсім свеце будуць паважаць прафесійныя рэкамендацыі СААЗ і прадоўжаць супрацоўніцтва з Кітаем у нармальным рэжыме", - сказаў дыпламат.
Пасол асабліва адзначыў, што пасля пачатку эпідэміі пнеўманіі, выкліканай новым тыпам каранавіруса, Прэзідэнт Беларусі Аляксандр Лукашэнка накіраваў у адрас Старшыні КНР Сі Цзіньпіна пасланне, у якім выказаў падтрымку ў сувязі з існуючым становішчам, а таксама даў распараджэнне беларускаму ўраду аказаць гуманітарную дапамогу Кітаю і неаднаразова даручаў адпаведным органам падтрымаць барацьбу кітайскага народа з эпідэміяй, а таксама падкрэсліў, што не трэба верыць непраўдзівай інфармацыі.
"Міністэрствы замежных спраў, аховы здароўя, адукацыі і іншыя дзяржаўныя ведамствы Беларусі прынялі належныя меры і развіваюць сапраўды эфектыўнае супрацоўніцтва з Кітаем. Цяпер Беларусь прадаставіла дзве партыі гуманітарнай дапамогі, якая прыбыла ўжо ў нашу краіну. Кітайцы высока ацанілі дружалюбныя, недыскрымінацыйныя меры, прынятыя адпаведнымі ведамствамі Беларусі ў адносінах да кітайскіх грамадзян, якія пражываюць за мяжой, супрацоўнікаў кітайскіх кампаній, кітайскіх студэнтаў. Многія кітайскія карыстальнікі ў сетцы цяпер выкарыстоўваць фразу "сябар пазнаецца ў бядзе", каб падзякаваць Аляксандру Лукашэнку і беларускаму народу за глыбокую дружбу з кітайскім народам, - звярнуў увагу Цуй Цымін. - Я хачу падкрэсліць, што дзеянні Беларусі не толькі паказваюць глыбокую дружбу і рашучую падтрымку Прэзідэнта Беларусі і беларускага народа, але таксама адлюстроўваюць высокі ўзровень развіцця кітайска-беларускіх адносін, давернага ўсебаковага стратэгічнага партнёрства і ўзаемавыгаднага супрацоўніцтва пад стратэгічным кіраўніцтвам і асабістым клопаце лідараў дзвюх краін. Мы шчыра дзякуем народу Беларусі за своечасовую і важную дапамогу, аказаную Кітаю, і лічым, што гэта яшчэ больш умацуе цвёрдую рашучасць урада і народа Кітая ў барацьбе з эпідэміяй".
Пасол запэўніў, што Кітай прадоўжыць умацаванне сувязей з міжнароднай супольнасцю, уключаючы Беларусь, а таксама сумесную барацьбу з эпідэміяй.-0-
