9 красавіка, Мінск /Кар. БЕЛТА/. Сёння ў Рэспубліканскім цэнтры кіравання і рэагавання на надзвычайныя сітуацыі МНС пад кіраўніцтвам намесніка прэм'ер-міністра Анатоля Сівака адбылося пасяджэнне Камісіі па надзвычайных сітуацыях пры Савеце Міністраў. Удзельнічалі міністр па надзвычайных сітуацыях Вадзім Сіняўскі, кіраўнікі дзяржаўных органаў кіравання, абласных і Мінскага гарадскога выканкамаў. Аб гэтым БЕЛТА паведамілі ў прэс-службе МНС.
Галоўнай тэмай работы Камісіі па НС стала падрыхтоўка сіл і сродкаў ДСНС да пажаранебяспечнага перыяду ў гэтым годзе. Анатоль Сівак акцэнтаваў увагу на тым, што першарадная задача на сённяшні дзень - арганізаваць аператыўнае рэагаванне на ўзнікненне пажараў у экасістэмах.
Першы намеснік міністра па надзвычайных сітуацыях Аляксандр Худалееў адзначыў: у апошнія тры гады расце колькасць пажараў у экасістэмах. 87 працэнтаў ад агульнай колькасці - гэта ўзгаранні травы і кустоў. У бягучым годзе пажаранебяспечны сезон пачаўся ў першай дэкадзе сакавіка. Найбольшая колькасць пажараў у экасістэмах ліквідавана падраздзяленнямі МНС у Брэсцкай і Мінскай абласцях. Ён заклікаў прыняць вычарпальныя меры ў адносінах да кіраўнікоў аб'ектаў, якія дапускаюць несанкцыянаваныя звалкі і выпальванне леташніх раслін на корані.
Акрамя гэтага, першы намеснік міністра далажыў: з улікам абстаноўкі міністэрства падрыхтавала распараджэнне, у адпаведнасці з якім праведзена праверка тэхнічных сродкаў, арганізаваны наземны, авіяцыйны і касмічны маніторынг пажараў у экасістэмах, сфарміраваны зводныя атрады ратавальнікаў, гатовыя пры неабходнасці перадыслацыравацца ў любую кропку рэспублікі. Гэта дасць магчымасць мінімізаваць наступствы магчымых НС у экасістэмах.
Анатоль Сівак падкрэсліў: навядзенне парадку на зямлі павінна заставацца пад пастаянным кантролем мясцовых улад, Міністэрства прыродных рэсурсаў і аховы навакольнага асяроддзя. Ён таксама заслухаў даклады з месцаў.
Размова ішла і аб Нацыянальнай стратэгіі па зніжэнні рызыкі ўзнікнення надзвычайных сітуацый у Беларусі на 2019-2030 гады. Паводле слоў Анатоля Сівака, стратэгія - новы доўгатэрміновы дакумент, накіраваны на павышэнне бяспекі жыццядзейнасці грамадзян з акцэнтам на папярэджанне НС. Намеснік міністра па надзвычайных сітуацыях Андрэй Юржыц далажыў, што робіцца для яе паспяховай рэалізацыі. Так, распрацоўваецца праект канцэпцыі закона аб грамадзянскай абароне, уведзены ў эксплуатацыю Адукацыйны цэнтр бяспецы МНС, ствараюцца новая тэхніка і экіпіроўка для ліквідацыі надзвычайных сітуацый.
Пажарную бяспеку інтэрнатаў у сваім выступленні закрануў намеснік міністра па надзвычайных сітуацыях Анатоль Далгалявец. Ён падкрэсліў: кіраўнікі аб'ектаў павінны няўхільна выконваць заканадаўства аб пажарнай бяспецы, у тым ліку падтрымліваць спраўнымі сістэмы пажарнай аўтаматыкі. "Разгляд гэтага пытання звязаны з тым, што на фоне шматгадовага зніжэння колькасці надзвычайных сітуацый і загінулых ад іх людзей, выклікае занепакоенасць стан пажарнай бяспекі ў інтэрнатах", - адзначыў Анатоль Сівак.-0-
