16 студзеня, Мінск /Кар. БЕЛТА/. Усе падраздзяленні АСВОД на Вадохрышча пяройдуць на ўзмоцнены варыянт нясення службы, паведаміў журналістам старшыня Беларускага рэспубліканскага таварыства выратавання на водах (АСВОД) Анвар Ігамбердыеў, перадае карэспандэнт БЕЛТА.
Для акунання задзейнічаюць 87 месцаў. Ажыццяўляць бяспеку будуць каля 400 штатных работнікаў АСВОД. Магчыма, далучаць валанцёраў, у тым ліку з БРСМ. На мерапрыемствах будуць таксама дзяжурыць работнікі аховы здароўя, органаў і падраздзяленняў па надзвычайных сітуацыях, унутраных спраў.
У 2018 годзе, паводле ацэнак АСВОД, у мерапрыемствах прынялі ўдзел звыш 150 тыс. чалавек, у 2019-м - амаль 161 тыс. У гэтым годзе чакаецца каля 100 тыс. - знізіць цікавасць людзей можа адсутнасць лёду.
Анвар Ігамбердыеў звярнуў увагу, што акунацца трэба толькі ў спецыяльна падрыхтаваных месцах. Некаторую трывогу ў ратавальнікаў выклікае адсутнасць лёду на вадаёмах, і людзі могуць праводзіць вадохрышчанскі абрад у стыхійных, непрыстасаваных для гэтага месцах. З улікам умоў надвор'я АСВОД прывёў у гатоўнасць маторныя лодкі, катары, каб пры неабходнасці аказаць дапамогу.
Каб пазбегнуць стыхійнасці купання, у Мінску, напрыклад, у гэтым годзе вырашылі арганізаваць работу ў кругласутачным рэжыме. На ўсіх выратавальных станцыях акунуцца можна будзе з 16.00 18 студзеня да 24.00 19 студзеня.
Як адзначыў выконваючы абавязкі старшыні Мінскай гарадской арганізацыі АСВОД Дзмітрый Стаселька, у сталіцы прымуць жыхароў горада і гасцей на 8 станцыях - усе яны будуць працаваць ва ўзмоцненым рэжыме. Задзейнічаюць амаль 80 работнікаў АСВОД. Афіцыйна мерапрыемствы пачнуцца 18 студзеня ў 16.00 на выратавальнай станцыі "Камсамольскае возера" і ў 18.00 - на "Драздах". Будуць запрошаны прадстаўнікі праваслаўнай царквы, пройдзе асвячэнне месцаў купання.
Пасля вадохрышчанскіх мерапрыемстваў АСВОД прадоўжыць работу. У сувязі з магчымымі маразамі ў лютым асаблівы акцэнт зробяць на папярэджанні гібелі рыбакоў, якія выходзяць на лёд. Ім рэкамендуецца набыць камізэлькі. Менавіта дзякуючы ім, праваліўшыся, людзі не ідуць пад ваду, ім паспяваюць аказаць дапамогу.-0-
