Пад'езды да медустаноў, школ, дзіцячых садоў. Ратавальнікі і курсанты МНС дапамагаюць прыбіраць снег 

9 студзеня, Мінск /Кар. БЕЛТА/. Міністр па надзвычайных сітуацыях Вадзім Сіняўскі правёў селектарную нараду па пытаннях ліквідацыі наступстваў непагоды. Аб гэтым БЕЛТА паведамілі ў МНС. 

Міністр акцэнтаваў увагу на неабходнасці забеспячэння ўстойлівай работы аб'ектаў жыццезабеспячэння праз цеснае ўзаемадзеянне з мясцовымі ўладамі, ДАІ і камунальнымі службамі. У гэтых мэтах загадзя былі ўдакладнены алгарытмы рэагавання на надзвычайныя сітуацыі, у баявы разлік уведзена тэхніка павышанай праходнасці, а аварыйныя брыгады і перасовачныя электрастанцыі прыведзены ў стан поўнай гатоўнасці. 

Па рашэнні кіраўніка выратавальнага ведамства курсанты Універсітэта грамадзянскай абароны МНС і ратавальнікі Мінска і абласцей накіраваны на аказанне дапамогі ў расчыстцы снегу на аб'ектах гарадской інфраструктуры. Асноўныя намаганні сканцэнтраваны на расчыстцы пад'язных шляхоў да медыцынскіх устаноў, школ і дзіцячых садоў, уключаючы вызваленне ўваходных груп, дваровых тэрыторый і пад'ездаў для спецтранспарту, прыпыначных пунктаў. Асаблівая ўвага ўдзяляецца забеспячэнню свабоднага доступу для машын хуткай дапамогі і аварыйных службаў з мэтай аказання аператыўнай дапамогі людзям у выпадку надзвычайных і іншых няштатных сітуацый, садзейнічанню камунальным службам у расчыстцы снегу на аб'ектах гарадской інфраструктуры.-0-