Пачуць меркаванне моладзі. У БІСД стартаваў конкурс аналітычных праектаў

17 сакавіка, Мінск /Кар. БЕЛТА/. ІІ Рэспубліканскі маладзёжны конкурс аналітычных праектаў стартаваў сёння ў Беларускім інстытуце стратэгічных даследаванняў (БІСД), перадае карэспандэнт БЕЛТА.

"Гэты конкурс - адзін з этапаў вялікага маладзёжнага аналітычнага руху. Конкурс у першую чаргу накіраваны на тое, каб даць моладзі магчымасць прыслаць свае думкі і ідэі аб тым, якім яны бачаць далейшае развіццё нашай краіны. Конкурс будзе праходзіць на працягу бліжэйшых двух з паловай месяцаў. Крыху больш за месяц ёсць на тое, каб падаць заяўку на ўдзел. Тэмы і напрамкі, па якіх моладзь можа выказвацца, абсалютна розныя. У гэтым годзе мы прапанавалі 15 напрамкаў, якія адлюстроўваюць розныя вектары развіцця дзяржавы: лічбавыя тэхналогіі, штучны інтэлект, сельская гаспадарка, развіццё медыясферы і гэтак далей. Мы таксама хацелі б, каб моладзь прапанавала сваё бачанне кропак росту для Беларусі ў рамках пяцігодкі якасці", - аналітык БІСД, каардынатар маладзёжнага аналітычнага руху БІСД "Будучыня Беларусі" Яўген Харук.

Ён звярнуў увагу на тое, што адным з новаўвядзенняў конкурсу ў гэтым годзе стала правядзенне рэгіянальных адбораў. "Спачатку мы адбяром у кожным рэгіёне пяць-сем лепшых работ. У далейшым запросім фіналістаў у Мінск, дзе яны выступяць перад экспертамі рэспубліканскага ўзроўню. Аўтары лепшых работ, акрамя падарункаў ад арганізатараў і партнёраў конкурсу, атрымаюць магчымасць прыняць удзел у Летняй школе маладога аналітыка, дзе яны пройдуць навучанне аналітычнай дзейнасці, змогуць сустрэцца з экспертамі ў розных сферах, навучацца аналізаваць матэрыялы і пісаць аналітычныя дакументы", - адзначыў Яўген Харук.

Аналітык БІСД таксама расказаў, што з'яўляецца галоўным вынікам даследаванняў удзельнікаў конкурсу. "Сутнасць аналітыкі не ў тым, каб падрыхтаваць гатовае рашэнне, а ў тым, каб абмаляваць сітуацыю і падрыхтаваць матэрыялы па той альбо іншай праблеме. Самым галоўным вынікам даследаванняў, якія праводзяць нашы маладыя аналітыкі, з'яўляецца тое, што ў іх ёсць магчымасць данесці сваё бачанне да асоб, якія прымаюць рашэнні", - падкрэсліў каардынатар маладзёжнага аналітычнага руху БІСД "Будучыня Беларусі".

Сярод удзельнікаў конкурсу - студэнт 4-га курса Інстытута бізнесу БДУ Арцём Кузьмін. Разам з двума іншымі студэнтамі ён рыхтуе даследаванне па тэме "Дэмаграфічная палітыка як неад'емны фактар нацыянальнай бяспекі дзяржавы".

"Наш праект прысвечаны прапанаванню шляхоў вырашэння дэмаграфічнай праблемы з пункту гледжання таго, як моладзь бачыць гэта пытанне. На гэты момант у нас ёсць некалькі распрацовак у гэтым напрамку. Па-першае, мы павінны зразумець, што ўплывае на дэмаграфічны патэнцыял нашай дзяржавы з тэхніка-эканамічнага пункту гледжання. Другі напрамак аналізу - сацыялогія. Мы правядзём апытанне ў маладзёжным асяроддзі. На трэцім этапе мы прааналізуем усе сабраныя даныя і прапануем якія-небудзь рашэнні", - падкрэсліў Арцём Кузьмін.

Дапамагаць Арцёму ў даследаванні будзе студэнтка 3-га курса БДУІР Ганна Тарэлка. "У першую чаргу такія праекты дапамагаюць развіваць моладзь і фарміраваць аналітычнае асяроддзе. Дзякуючы такім мерапрыемствам у нас з'яўляюцца мэты, магчымасці, мы знаёмімся з новымі людзьмі, павышаем свой экспертны ўзровень. У будучым усё гэта паўплывае на наш выбар прафесіі", - упэўнена ўдзельніца конкурсу.-0-