17 чэрвеня, Мінск /Кар. БЕЛТА/. Усе звароты, якія засталіся пасля правядзення "Вялікай размовы з Прэзідэнтам", будуць даведзены да лагічнага завяршэння. Аб гэтым у праграме "Галоўны эфір" на тэлеканале заявіла кіраўнік Адміністрацыі Прэзідэнта Наталля Качанава, паведамляе БЕЛТА.
Паводле яе слоў, практычна ўсе пытанні разгледжаны. Сёння на кантролі з паступіўшых 2,5 тыс. засталося 102 звароты. "Недзе дадзены растлумачэнні, недзе хутка прыняты меры. І ёсць шэраг прыкладаў, як аператыўна спрацавалі мясцовыя органы ўлады. Тыя звароты, якія засталіся на кантролі, абавязкова давядзём да лагічнага завяршэння. Гэта пытанні, звязаныя з неабходнасцю ўнясення змяненняў і дапаўненняў у заканадаўства, таму патрэбны час", - адзначыла Наталля Качанава. Акрамя таго, толькі па выніках "Вялікай размовы з Прэзідэнтам" Адміністрацыя Прэзідэнта правяла 32 выязныя прыёмы грамадзян, на якія прыйшлі каля 600 чалавек.
Наталля Качанава расказала аб пытаннях, якія паступілі ў час падрыхтоўкі і правядзення "Вялікай размовы з Прэзідэнтам". Яны датычыліся працаўладкавання, сацыяльнай абароны, падтрымкі сем'яў, якія выхоўваюць дзяцей, выкарыстання сямейнага капіталу. "І вось ужо на ўзроўні кіраўніка дзяржавы рашэнне прынята. Гэты падыход будзе дзейнічаць і на наступную пяцігодку. Што датычыцца выкарыстання сродкаў сямейнага капіталу, то гэта пытанне разглядаецца на ўзроўні ўрада і профільнага міністэрства", - дадала кіраўнік Адміністрацыі Прэзідэнта.
"Мы часам бачым, што разглядаемы зварот да канца не выкананы. Напрыклад, людзі скардзяцца на холад у кватэрах, цвіль і сырасць. І нашы службы пачынаюць прымаць меры: давайце ўстановім дадатковыя секцыі радыятараў - не даюць рэзультату, давайце правядзём уцяпленне сцяны - не дае рэзультату. А ўсё чаму? Таму што павінен быць прафесійны падыход пры вырашэнні такіх пытанняў", - прадоўжыла Наталля Качанава. Неабходна разабрацца, чаму здарылася тая ці іншая сітуацыя, каб яе ўрэгуляваць з карысцю для ўсіх жыхароў дома.
Кіраўнік Адміністрацыі Прэзідэнта падкрэсліла, што з людзьмі трэба працаваць больш. "Зусім нядаўна на кадравым дні Прэзідэнт яшчэ раз зрабіў акцэнт, што мясцовыя органы ўлады павінны актыўна працаваць з насельніцтвам. Гэта трэба для таго, каб людзі ведалі і разумелі, што ў іх горадзе, раёне, вёсцы будзе зроблена ў бліжэйшы час. А калі недзе кіраўнікі недапрацоўваюць у інфармацыйнай прасторы, то людзі вымушаны звяртацца, - адзначыла яна. - Я заўсёды гавару: калі людзі звяртаюцца ў мясцовыя органы ўлады - гэта добра. Значыць, яна давяраюць уладзе на месцах і адчуваюць, што гэтыя пытанні могуць быць вырашаны і няма неабходнасці звяртацца ў вышэйшыя інстанцыі або пісаць паўторныя звароты".
Асаблівая ўвага ў Адміністрацыі Прэзідэнта ўдзяляецца паўторным зваротам і тым, якія паступаюць у вышэйшыя органы. "Гэта характарызуе работу на месцах. Тут можна даць ацэнку ў пэўнай меры кіраўнікам рознага ўзроўню", - дадала Наталля Качанава. Работа са зваротамі грамадзян у Беларусі пастаянная, дакладна выбудавана і вызначана заканадаўча, падкрэсліла яна.
Як паведамлялася, у час падрыхтоўкі і правядзення "Вялікай размовы з Прэзідэнтам" на імя кіраўніка дзяржавы паступіла каля 2,5 тыс. зваротаў. У тым ліку амаль 2 тыс. - ад чытачоў БЕЛТА ў час акцыі "Ваша пытанне Прэзідэнту", якая праходзіла 27-28 лютага. У адпаведнасці з даручэннем Аляксандра Лукашэнкі работа па разглядзе зваротаў знаходзіцца на кантролі ў Адміністрацыі Прэзідэнта.-0-
