9 чэрвеня, Мінск /Кар. БЕЛТА/. Для шматдзетных сем'яў на 1 чэрвеня 2021 года адкрыта 99 735 дэпазітных рахункаў "Сямейны капітал", з якіх па праграме 2020-2024 гадоў - 17 336, паведамілі БЕЛТА ў Міністэрстве працы і сацыяльнай абароны.
Па праграме "Сямейны капітал" 2015-2019 гадоў для шматдзетных сем'яў адкрыта 82 399 дэпазітных рахункаў на суму $824 млн. Памер назначанай у мінулую пяцігодку сумы складаў $10 тыс. для шматдзетных сем'яў, у якіх трэцяе або наступнае дзіця нарадзілася (усыноўлена, удачарона) у перыяд з 1 студзеня 2015 года па 31 снежня 2019 года ўключна.
Па праграме 2020-2024 гадоў для шматдзетных сем'яў адкрыта 17 336 дэпазітных рахункаў на суму Br393,7 млн. У новай пяцігодцы сямейны капітал назначаецца шматдзетным сем'ям, у якіх трэцяе або наступнае дзіця нарадзілася (усыноўлена, удачарона) з 1 студзеня 2020 года па 31 снежня 2024 года ўключна. У 2020 годзе яго памер складаў Br22,5 тыс., а з 1 студзеня 2021 года - Br23 737,5. Звярнуцца па назначэнне сямейнага капіталу можна не пазней за 6 месяцаў з дня нараджэння (усынаўлення, удачарэння) трэцяга дзіцяці або наступных дзяцей.
"На 1 чэрвеня бягучага года на датэрміновае распараджэнне сродкамі сямейнага капіталу пададзена 36 651 заява. З іх на паляпшэнне жыллёвых умоў - 32 717 (89 працэнтаў), на атрыманне адукацыі - 1768 (5 працэнтаў), на атрыманне медыцынскіх паслуг - 2166 (6 працэнтаў). Прынята 34 568 рашэнняў аб датэрміновым распараджэнні сродкамі сямейнага капіталу", - адзначылі ў Мінпрацы.
Больш за ўсё рашэнняў аб размарозцы сямейнага капіталу прынята ў Брэсцкай вобласці - 7461, следам ідуць Мінская - 5755, Гомельская - 5597, Мінск - 4694, Гродзенская - 4075, Магілёўская - 3554. Менш за ўсё такіх рашэнняў прынята ў Віцебскай вобласці - 3432.-0-