29 снежня, Мінск /Кар. БЕЛТА/. Змяненні ў Канстытуцыю даюць надзейную страхоўку ад недапушчальных для беларусаў падыходаў у эканоміцы і сацыяльнай сферы. Аб гэтым заявіў старшыня Федэрацыі прафсаюзаў Беларусі Міхаіл Орда ў час сумеснага пасяджэння кіруючых органаў Федэрацыі прафсаюзаў, БРСМ і аб'яднання ветэранаў. У мерапрыемстве прынялі ўдзел таксама прадстаўнікі рэспубліканскага грамадскага аб'яднання "Патрыёты Беларусі" і дабрачыннага фонду Аляксея Талая. Аб гэтым БЕЛТА паведамілі ў прэс-службе ФПБ.
"Сёння з боку Захаду ідзе вельмі агрэсіўнае навязванне нашаму народу, краіне памылковых, чужых нам арыенціраў. Прычым ва ўсіх сферах: ад культуры, гісторыі, сацыяльнай сферы да эканомікі. Мы ўсе бачым, як яны спрабуюць разбурыць традыцыйны інстытут сям'і. Як стараюцца перапісаць гісторыю і праўду аб Вялікай Айчыннай вайне. І ўжо гавораць, што гэта ледзь ці не нашы дзяды і прадзеды напалі на іх з вайной. Калі гэтаму не паставіць заслон, мы разумеем, да чаго гэта можа прывесці. Далёка за прыкладамі хадзіць не трэба. У некаторых краінах ужо сёння фактычна ўведзена забарона на святкаванне Дня Перамогі і адкрыта падтрымліваецца нацызм. Для нас, беларусаў, гэта фактычна здрадніцтва нашай памяці", - сказаў Міхаіл Орда.
Паводле яго слоў, у эканоміцы нам спрабуюць навязаць заходнюю мадэль, дзе ў прыярытэце не чалавек, а выключна бізнес і грошы. "Менавіта таму нам настойліва гавораць, маўляў, адмоўцеся ад сацыяльных праграм, урэжце падтрымку шматдзетных, перавядзіце медыцыну на платную аснову і гэтак далей. Для нас, беларусаў, усё гэта непрымальна. Таму ў прапанаваных змяненнях Канстытуцыі закладзены механізмы, якія даюць надзейную страхоўку ад такіх падыходаў у эканоміцы і сацыяльнай сферы, - адзначыў старшыня ФПБ. - Гэта ў першую чаргу палажэнні аб захаванні сацыяльнага курсу дзяржавы, падтрымцы сацыяльна слабаабароненых катэгорый людзей - сем'яў з дзецьмі, інвалідаў, пажылых людзей, стварэнні ўмоў для развіцця кожнага чалавека. Гэта вельмі важна, паколькі яшчэ раз падкрэслівае, што, нягледзячы на ўсе складанасці і ўсе пераўтварэнні, якія будуць у далейшым, сацыяльная арыентаванасць палітыкі і эканомікі застанецца адным з галоўных вектараў дзяржавы".
Безумоўна, прафсаюзы падтрымліваюць гэтыя напрамкі нашага агульнага далейшага развіцця. "Таксама мы адназначна падтрымліваем тэзіс праекта Канстытуцыі аб неабходнасці захавання гістарычнай праўды аб подзвігу беларускага народа ў Вялікай Айчыннай вайне. Сумесна з ветэранамі, моладдзю мы на працягу многіх гадоў працуем у гэтым напрамку. І бачым, што гэта тэма адгукаецца абсалютнай большасці беларусаў. Усю праўду аб тых трагічных падзеях, аб тым, як нашы прадзеды і дзяды абаранялі сваю Радзіму, трэба захаваць і перадаць нашым дзецям. Гэта агульная пазіцыя ўсіх канструктыўных, патрыятычна настроеных грамадскіх аб'яднанняў. Таму сёння мы дзейнічаем з імі ў адным ключы і разам працуем над захаваннем таго, што дорага кожнаму беларусу, - нашых традыцый як у гісторыі, культуры, так і ў сацыяльнай сферы", - дадаў Міхаіл Орда.-0-
