3 кастрычніка, Мінск /Уладзімір Мацвееў - БЕЛТА/. Новую рэдакцыю Жыллёвага кодэкса Беларусі разгледзяць ужо на асенняй сесіі парламента. Аб гэтым расказаў журналістам міністр жыллёва-камунальнай гаспадаркі Аляксандр Церахаў, перадае карэспандэнт БЕЛТА.
"Прадугледжваецца праект новай рэдакцыі Жыллёвага кодэкса разгледзець на асенняй сесіі ў парламенце. У далейшым адбудзецца працэдура прыняцця яе ва ўстаноўленым парадку", - сказаў Аляксандр Церахаў.
Праект адпаведнага дакумента падрабязна абмяркоўваўся на нарадзе ў Прэзідэнта Беларусі. "Кіраўніку дзяржавы былі даложаны асноўныя палажэнні новай рэдакцыі Жыллёвага кодэкса, што фактычна ўключыў у сябе ўсе тыя змяненні, якія адбыліся з моманту прыняцця папярэдняй рэдакцыі. Нягледзячы на тое што мінула ўсяго толькі пяць гадоў, за гэты час жыллёвыя праваадносіны значна змяніліся", - адзначыў міністр.
Ён прывёў прыклад, што змяніліся віды, структура жыллёвага фонду, уведзена новае паняцце арэнднага жылля. "Сённяшняя рэдакцыя Жыллёвага кодэкса якраз уключыла ў сябе як падагульняючы дакумент усе тыя змяненні, якія былі ажыццёўлены, апрабаваны", - сказаў Аляксандр Церахаў.
Міністр падкрэсліў, што па сутнасці, размова ідзе аб зусім новым дакуменце, а не ўнясенні змяненняў у дзеючы кодэкс. Пасля прыняцця і ўступлення ў сілу новая яго рэдакцыя будзе з'яўляцца настольнай кнігай і своеасаблівай канстытуцыяй для ўсіх работнікаў жыллёва-камунальнай гаспадаркі і жыхароў, якіх цікавяць тыя ці іншыя праваадносіны.
Адказваючы на пытанне аб тым, чаму спатрэбілася гэта пытанне выносіць на ўзровень Прэзідэнта, Аляксандр Церахаў растлумачыў: "Ёсць шэраг новаўвядзенняў і ўдакладненняў, якія сапраўды патрабавалі згоды кіраўніка дзяржавы. Яны былі даложаны. Прэзідэнт даручыў у абавязковым парадку ўлічыць у новай рэдакцыі Жыллёвага кодэкса адзіныя падыходы да пастаноўкі на чаргу. Нормы павінны быць прапісаны такім чынам, каб выключыць якія-небудзь пралазы, якія, магчыма, сёння ёсць".
Міністр таксама адказаў на пытанне, ці не чакаецца якіх-небудзь змяненняў адносна шэрага аказваемых жыллёва-камунальных паслуг, у тым ліку ў пытаннях капрамонту, вывазу цвёрдых бытавых адходаў, карыстання ліфтам. "Нарматыўна агульнымі штрыхамі гэтыя нормы прапісаны ў новай рэдакцыі Жыллёвага кодэкса. Ёсць адсылка па капітальным рамонце, што гэта рэгулюецца нормамі жыллёвага заканадаўства. Але каб мы маглі гаварыць, што нешта прынцыпова і кардынальна змянілася, то рэвалюцыйных змяненняў Жыллёвы кодэкс у сабе не нясе", - сказаў ён.-0-
