(АБНОЎЛЕНА)
22 сакавіка, Лагойскі раён /Кар. БЕЛТА/. Сёння ў мемарыяльным комплексе "Хатынь" асабліва шматлюдна: беларусы і госці краіны далучыліся да акцыі "Прыйдзі і пакланіся", прысвечанай 83-й гадавіне страшнай трагедыі спаленай фашыстамі разам са 149 жыхарамі вёскі, якая стала сімвалам смутку і няскоранасці народа, перадае карэспандэнт БЕЛТА.
Людскі паток на мемарыял, які быў створаны на месцы знішчанай карнікамі вёскі, не змяншаецца доўгія гады. Тут схіляюць галовы сівавалосыя старыя, яшчэ раз перачытваючы на комінах сімвалічных хат імёны спаленых у агні хатынцаў, сярод якіх было 75 дзяцей, успамінаючы тых, хто пайшоў ваяваць з іх сем'яў. Вайна змяніла лёсы мільёнаў людзей, стаўшы страшным эпізодам у гісторыі роду кожнага беларуса. У "Хатыні" атрымліваюць першыя ўрокі мужнасці тыя, каму яшчэ трэба будзе стаяць на абароне міру. І гэта сувязь пакаленняў, для якіх такой важнай з'яўляецца гістарычная памяць, не павінна абарвацца. Сёння, у Дзень памяці ахвяр Хатынскай трагедыі, тысячы людзей зноў нясуць кветкі, а ў самых аддаленых кутках Беларусі каля брацкіх магіл і помнікаў спаленым вёскам праходзяць мітынгі. Апоўдні беларусаў аб'яднала мінута маўчання - жалобны метраном прымусіў кожнага яшчэ раз задумацца аб няўстойлівасці міру.
Першым да Вечнага агню ўсклалі вянок ад Прэзідэнта Беларусі Аляксандра Лукашэнкі.
Кветкі і кветкавыя кампазіцыі як сімвал глыбокай павагі загінулым хатынцам і ўсім ахвярам вайны да фігуры Няскоранага чалавека, брацкай магілы, у якой пахаваны астанкі спаленых жыхароў вёскі, і да Вечнага агню ўсклалі вышэйшыя службовыя асобы, кіраўнікі міністэрстваў і ведамстваў, якія ўзначалілі свае дэлегацыі, прадстаўнікі грамадскіх аб'яднанняў і арганізацый, моладзь, школьнікі, сілавікі, да якіх далучыліся выхаванцы ваенна-патрыятычных клубаў.
У гэты дзень у Хатыні шмат простых сем'яў з розных куткоў краіны і замежжа. Многія прыехалі з маленькімі дзецьмі, якім старэйшыя сёння даюць важны ўрок патрыятызму. Здаецца, што паток з жадаючых далучыцца да агульнай памяці бясконцы - людзі, якія жывуць у такім няпростым свеце, напоўненым кропкамі ўзброеных канфліктаў, сталі асабліва цаніць сваё чыстае неба над галавой, і такім адзінствам дэманструюць сваю прыналежнасць да мірнай нацыі.
Аб тым, што мемарыяльны комплекс "Хатынь" застаецца месцам пакланення і асаблівага шанавання, сведчаць лічбы. У 2025 годзе мемарыял і яго філіялы наведалі больш як 725 тыс. чалавек, што на 119 працэнтаў больш, чым за аналагічны перыяд 2024 года. І гэта не толькі грамадзяне Беларусі, але і прадстаўнікі блізкага і далёкага замежжа. Супрацоўнікамі ўстановы за мінулы год праведзена 114 тыс. экскурсій. Адным з ключавых напрамкаў папулярызацыі дзейнасці мемарыяла стала выставачная работа, дзе падрыхтавана і прадстаўлена 14 выставачных праектаў, рэалізаваных на ўласных пляцоўках і ў рамках міжмузейнага міжнароднага супрацоўніцтва. Цяпер у музеі мемарыяльнага комплексу праходзіць выстава "Лёс падарыў шчасце жыць…", на якой прадстаўлены ўнікальныя фатаграфіі, дакументы і асабістыя рэчы выжыўшых сведкаў трагедыі ў Хатыні.
Сёння цэлы дзень адкрыта царква Раства Прасвятой Багародзіцы ў Хатыні: усклаўшы кветкі, наведвальнікі комплексу могуць зайсці ў храм і паставіць свечку памяці.-0-
Падпісвайцеся на нас у
