2 чэрвеня, Мінск /Кар. БЕЛТА/. Цікавасць розных краін свету да такіх арганізацый, як ЕАЭС, ШАС і БРІКС, сведчыць аб тым, што падзеі на міжнароднай арэне развіваюцца не па амерыканскім сцэнарыі. Такі пункт гледжання ў праекце "У тэме" на YouTube-канале БЕЛТА выказаў расійскі ваенны аглядальнік газеты "Комсомольская правда" палкоўнік у адстаўцы Віктар Баранец.
Віктар Баранец падзяліўся меркаваннем аб нядаўнім саміце ЕАЭС, які прайшоў у Маскве. "Я быў бы вялікім ілгуном, калі сказаў бы, што Еўразійскі эканамічны саюз фарміруецца без праблем. Такога я сказаць не магу. Але мяне не можа не радаваць, што Еўразійскі эканамічны саюз не абмяжоўваецца дзеючымі краінамі-ўдзельніцамі. Да яго пачынаюць прыглядацца і стукаць у дзверы іншыя краіны, якія былі далёка ад цэнтра фарміравання гэтага саюза. Гэта вельмі радуе", - сказаў Віктар Баранец.
Ваенны аглядальнік прывёў у прыклад і іншую міждзяржаўную арганізацыю - БРІКС. На яго думку, да яе таксама пачынаюць актыўна прыглядацца дзяржавы, якія не з'яўляюцца членамі арганізацыі. "Цяпер намячаецца вельмі цікавая тэндэнцыя. Возьмем тую ж ШАС. Там з'яўляецца ўсё больш наглядальнікаў, кандыдатаў у члены. Аналагічная сітуацыя адбываецца і з Еўразійскім эканамічным саюзам. У свеце адбываецца нешта такое, што ідзе зусім не па амерыканскім сцэнарыі", - адзначыў ваенны аглядальнік.
Віктар Баранец лічыць, што цікавасць розных краін свету да ШАС, БРІКС і ЕАЭС сведчыць аб тым, што міжнародная дыпламатыя амерыканскага ўзору знаходзіцца ў заняпадзе. "Свяшчэнныя законы дыпламатыі гніюць на сметніку. Дыпламатыя ўжо гаворыць мовай бандытаў. А гэта першая прыкмета наспяваючай сусветнай вайны", - рэзюмаваў Віктар Баранец.-0-
