1 лістапада, Мінск /Кар. БЕЛТА/. Некаторыя аддзяленні бальніц у шэрагу рэгіёнаў вяртаюцца да аказання планавай дапамогі, паведамляе БЕЛТА са спасылкай на прэс-службу Міністэрства аховы здароўя.
У Беларусі тэмпы прыросту захваральнасці на COVID-19 крыху змяншаюцца. Ужо другі тыдзень рэгіструецца нязначная тэндэнцыя па зніжэнні тэмпаў шпіталізацыі пацыентаў у стацыянары. Больш таго, на некалькі чалавек у суткі змяншаецца і колькасць пацыентаў, якія знаходзяцца на штучнай вентыляцыі лёгкіх (ШВЛ).
"У трох абласцях эпідсітуацыя дазваляе паэтапна выводзіць некаторыя аддзяленні з кавіднага рэжыму. Усе РНПЦ і частка стацыянараў абласцей і Мінска ў поўным аб'ёме прадаўжаюць аказваць планавую дапамогу", - адзначылі ў прэс-службе.
У прыватнасці, Брэсцкая вобласць паэтапна пачынае перапрафіляванне ложкаў, раней задзейнічаных для аказання меддапамогі пацыентам з каранавірусам, па асноўным профілі іх дзейнасці. Паступова ўваходзяць у планавую работу аддзяленні гінекалагічнага корпуса абласнога радзільнага дома. Плануецца, што з 1 лістапада, пасля правядзення мерапрыемстваў па дэзынфекцыі, паэтапна пачнуць планавую работу частка аддзяленняў у Брэсцкім абласным анкадыспансеры, а таксама кардыяхірургічнае аддзяленне і аддзяленне таракаабдамінальнай хірургіі і трансплантацыі ў Брэсцкай абласной клінічнай бальніцы.
У Віцебскай вобласці за мінулы тыдзень амаль 200 інфекцыйных ложкаў перапрафіляваны для работы ў звычайным рэжыме. З 28 кастрычніка прыпынена шпіталізацыя пацыентаў з пнеўманіямі з інфекцыяй COVID-19 у Віцебскую гарадскую бальніцу нумар 1. А з 1 лістапада аднаўляе работу хірургічны корпус нумар 2 Віцебскага абласнога анкадыспансера.
Захавана даступнасць усіх відаў экстраннай і планавай меддапамогі і ў Гомельскай вобласці. Больш таго, з 1 па 7 лістапада плануецца вярнуць у звычайны рэжым работы 248 ложкаў у розных аддзяленнях цэнтральных раённых бальніц. Напрыклад, у Брагінскай ЦРБ плануецца адкрыць 5 акушэрска-гінекалагічных ложкаў, Веткаўскай ЦРБ - 25 ложкаў рэабілітацыі, Добрушскай ЦРБ - 10 тэрапеўтычных ложкаў, Жыткавіцкай ЦРБ - 30 тэрапеўтычных ложкаў, Жлобінскай ЦРБ - 25 інфекцыйных ложкаў, Калінкавіцкай ЦРБ - 5 педыятрычных і 10 кардыялагічных ложкаў, Лельчыцкай ЦРБ - 3 рэанімацыйныя і 12 тэрапеўтычных ложкаў.
Акрамя таго, з 1 лістапада ў Магілёўскім абласным анкадыспансеры, пасля правядзення мерапрыемстваў па дэзынфекцыі, будуць перапрафіляваны ў звычайны рэжым работы 180 ложкаў для аказання профільнай дапамогі пацыентам анкалагічнага профілю.-0-
