13 лютага, Масква /Эдуард Півавар - БЕЛТА/. Трактары МТЗ, камбайны "Гомсельмаш", глебаапрацоўчыя агрэгаты "Амкадор", кормараздатчыкі і кормазмяшальнікі "Запаграмаш" прадстаўляюць беларускія прадпрыемствы на II Міжнароднай спецыялізаванай выстаўцы "ТатАграЭкспа", якая адкрылася 12 лютага ў выставачным цэнтры "Казань Экспа" ў час Паволжскага аграпрамысловага форуму. Аб гэтым БЕЛТА паведамілі ў прэс-службе пасольства Беларусі ў Расіі.
"Беларускую экспазіцыю агледзеў Прэзідэнт Татарстана Рустам Мініханаў. Яму былі прадстаўлены навінкі трактарнай тэхнікі МТЗ, у тым ліку газаматорнай, а таксама камбайны "Палессе", - адзначылі ў дыпмісіі.
Выстаўка дэманструе сельгастэхніку, абсталяванне і запчасткі, сродкі аховы раслін і ўгнаенні, насенне, абсталяванне для перапрацоўкі, упакоўкі і многае іншае. "Кіраўнік аддзялення пасольства Беларусі ў Казані Алег Ісаеў сумесна з прадстаўнікамі МТЗ, "Гомсельмаша" і "Амкадора" прыняў удзел у пашыраным пасяджэнні калегіі Міністэрства сельскай гаспадаркі і харчавання Татарстана, дзе былі падведзены вынікі работы аграпрамысловага комплексу расійскага рэгіёна за 2019 год", - дадалі ў прэс-службе.-0-
