Нацыянальны аэрапорт Мінск пацвердзіў гатоўнасць да работы ў вясенне-летні перыяд

17 красавіка, Мінск /Кар. БЕЛТА/. Завяршылася планавая штогадовая падрыхтоўка Нацыянальнага аэрапорта Мінск да работы ў вясенне-летні перыяд, паведамілі БЕЛТА ў прэс-службе паветранай гавані.

Аэрадром Мінск-2, аэрадромы філіялаў Орша і Магілёў, будынкі і збудаванні прадпрыемства падрыхтаваны да работы. Праведзена таксама сезоннае і тэхнічнае абслугоўванне аэранавігацыйнага, радыётэхнічнага і святлосігнальнага абсталявання, прызначанага для забеспячэння палётаў, і авіяцыйнай электрасувязі, а таксама транспартных сродкаў, спецмашын, сродкаў пероннай механізацыі, сродкаў наземнага абслугоўвання паветраных суднаў.

Супрацоўнікі аэрапорта, уключаючы філіялы, прайшлі дадатковае тэарэтычнае і практычнае навучанне, паўторныя інструктажы і трэніроўкі, звязаныя з работай у бліжэйшы перыяд.

Гатоўнасць Нацыянальнага аэрапорта Мінск да работы ў вясеннія і летнія месяцы праверыла спецыяльная камісія. Заключэнне такое: мерапрыемствы, намечаныя комплексным планам падрыхтоўкі аэрапорта да работы ў вясенне-летні перыяд, выкананы. Службы аэрапорта і філіялы прадэманстравалі гатоўнасць да бліжэйшага сезона. Па выніках праведзеных праверак аформлены пратаколы, акты і загады аб допуску персаналу, спецтэхнікі, інфраструктуры прадпрыемства да работы.-0-