1 снежня, Мінск /Кар. БЕЛТА/. Натарыусы Беларусі 4 снежня будуць кансультаваць бясплатна, паведаміў БЕЛТА памочнік старшыні Беларускай натарыяльнай палаты Артур Стрэх.
У гэтым годзе рэспубліканская дабрачынная акцыя, прымеркаваная да святкавання Дня юрыста ў Беларусі, пройдзе ў рэжыме анлайн. Удзел у ёй прымуць усе натарыяльныя канторы і натарыяльныя бюро краіны.
На працягу рабочага дня жыхары і госці Беларусі могуць атрымаць кансультацыю па пытаннях, якія ўваходзяць у кампетэнцыю натарыуса, у тым ліку па афармленні спадчынных правоў, складанні завяшчанняў, шлюбных дагавораў, адчужэнні нерухомай маёмасці, ажыццяўленні выканаўчых надпісаў. Для аховы насельніцтва ад магчымых рызык заражэння каранавіруснай інфекцыяй у дзень акцыі натарыусы бясплатна пракансультуюць па тэлефонах натарыяльных кантор і натарыяльных бюро, а таксама дыстанцыйна з прымяненнем відэасувязі (мэсэнджары). Фармат прадастаўлення кансультацыі можна ўзгадніць загадзя, пазваніўшы ў натарыяльную кантору або натарыяльнае бюро.
Поўны спіс натарыяльных кантор і натарыяльных бюро, а таксама іх кантактныя даныя можна ўдакладніць на сайце Беларускай натарыяльнай палаты belnotary.by ў раздзеле "Знайсці натарыуса".-0-
