27 снежня, Полацкі раён /Алеся Пушнякова - БЕЛТА/. Старшыня Савета Рэспублікі Наталля Качанава павіншавала выхаванцаў цэнтра карэкцыйна-развіваючага навучання і рэабілітацыі (ЦКРНіР) Полацкага раёна з надыходзячымі святамі і ўручыла кіраўніку ўстановы адукацыі сертыфікат на тэлевізар, перадае карэспандэнт БЕЛТА.
Госці цэнтра пабывалі на навагоднім свяце, якое арганізавалі для дзяцей педагогі. Песні, танцы, гульні, конкурсы нікога не пакінулі абыякавымі. Хлопчыкам і дзяўчынкам трэба было разам з героямі спектакля прайсці выпрабаванні: адгадаць загадкі каварнага Грынча, знайсці нумар тэлефона Дзеда Мароза, а затым дапамагчы зімоваму чараўніку і яго ўнучцы Снягурачцы запаліць агні на навагодняй ёлцы.
Усяго ў ЦКРНіР 84 выхаванцы да 18 гадоў, у іх ёсць цяжкія шматлікія парушэнні. Тут арганізавана работа па ранняй комплекснай дапамозе дзецям да 3 гадоў. Хлопчыкі і дзяўчынкі вучацца ў 3 дашкольных групах і 4 спецыяльных класах. Навучальны працэс пабудаваны па асаблівай праграме. Асноўны акцэнт робіцца на сацыялізацыю дзяцей з асаблівасцямі псіхафізічнага развіцця.
"Гэта свята патрэбна, бясспрэчна, нашым дзецям, але яно патрэбна і нам. У такія імгненні мы можам у поўнай меры адчуць сябе шчаслівымі, таму што мы побач з дзецьмі. Я кожны раз атрымліваю зарад энергіі, калі сустракаюся з хлопчыкамі і дзяўчынкамі. Акцыя "Нашы дзеці", якую ў свой час ініцыяваў Прэзідэнт Беларусі Аляксандр Лукашэнка, па ўсёй краіне знаходзіць вялікую падтрымку. Тут, у карэкцыйным цэнтры, педагогі робяць вялікую справу, клапоцяцца аб дзецях, прымяняюць інавацыйныя метады навучання. Павіншаваць з надыходзячымі святамі хацелася б і бацькоў, паколькі выхоўваць дзяцей - гэта, бадай, самая складаная работа. І яшчэ хачу пажадаць шчасця хлопчыкам і дзяўчынкам, каб яны раслі здаровымі, любілі сваю краіну, ганарыліся ёю", - адзначыла Наталля Качанава.
Да марафону добрых спраў далучылася і мясцовая ўлада. Старшыня Полацкага райвыканкама Ігар Марковіч уручыў карэкцыйнаму цэнтру сертыфікат на Br3 тыс., якія пойдуць на ўмацаванне матэрыяльна-тэхнічнай базы ўстановы адукацыі.-0-
