Сяргей Налівайка
12 чэрвеня, Мінск /Кар. БЕЛТА/. Памочнікі Прэзідэнта павінны адпавядаць той высокай планцы, якую ставіць кіраўнік дзяржавы, і ўнікаць у самы шырокі спектр пытанняў. Аб гэтым заявіў журналістам памочнік Прэзідэнта - інспектар па Магілёўскай вобласці Сяргей Налівайка па выніках нарады Аляксандра Лукашэнкі з кіраўніцтвам Адміністрацыі Прэзідэнта Беларусі, перадае карэспандэнт БЕЛТА.
Ролі памочнікаў Прэзідэнта на нарадзе ўдзялялася значная ўвага. Паколькі ў сферы іх адказнасці знаходзяцца многія актуальныя пытанні, якія потым выносяцца на ўзровень кіраўніка дзяржавы. Напрыклад, звароты грамадзян, у якіх часта закранаюцца праблемы, што знаходзяцца ў кампетэнцыі мясцовых органаў улады. Яны ж павінны займацца падборам кадраў для рэгіёнаў, бачыць нейкія сістэмныя недахопы, якія, магчыма, патрабуюць абмеркавання на ўзроўні Прэзідэнта, і прапаноўваць іх да разгляду на самым высокім узроўні.
Падрабязна абмяркоўвалася на канкрэтных прыкладах, як памочнікам эфектыўна выбудоўваць сваю работу з улікам таго, што асобныя сферы дзейнасці для іх не зусім знаёмыя. Напрыклад, сам Сяргей Налівайка, які працуе цяпер памочнікам Прэзідэнта - інспектарам па Магілёўскай вобласці, раней доўгі час узначальваў Міністэрства па падатках і зборах, таму разабрацца ў сферы сельскай гаспадаркі для яго крыху складаней. У сувязі з гэтым абмяркоўвалася, каб памочнікі маглі пры неабходнасці звяртацца за кансультацыяй да профільных спецыялістаў, далучаць іх да работы, у тым ліку з выездам на канкрэтныя аб'екты.
Гаворачы пра свой асабісты вопыт, Сяргей Налівайка адзначыў, што самае значнае для яго адрозненне работы памочніка Прэзідэнта ад іншай кіруючай дзейнасці, у тым ліку ад работы на пасадзе міністра, у тым, што неабходна ўнікаць у зусім розныя сферы. "Не тваіх пытанняў і не тваіх тэм няма", - падкрэсліў ён.
"Другі аспект - пастаянна сябе стараешся настройваць на тое, каб глядзець на рэчы вачыма Прэзідэнта. Ведаючы яго патрабавальнасць, прынцыповасць, дакладнасць і прадметнасць, гэта не заўсёды атрымліваецца, але вымушае расці, падцягвацца, - дадаў Сяргей Налівайка. - Сапраўды, ёсць рэчы, з якімі ні я, ні мае калегі не сутыкаліся раней. Сур'ёзна вывучаем, асвойваем. У рознай ступені паспяховасці атрымліваецца, але тым не менш той высокай планцы, пра якую гаворыць кіраўнік дзяржавы, неабходна адпавядаць. Таму будзем старацца".
Журналісты спыталі, як удаецца пазбегнуць дубліравання функцый з мясцовымі органамі ўлады і як на месцах у цэлым рэагуюць на памочнікаў. Адказваючы на першую частку пытання, памочнік па Магілёўскай вобласці заявіў, што дубліравання няма, таму што ва ўсіх бакоў ёсць дакладнае разуменне: усе працуюць на адну мэту. Што датычыцца другой часткі пытання, Сяргей Налівайка адзначыў, што ўлады на месцах у цэлым канструктыўна ўзаемадзейнічаюць з памочнікамі Прэзідэнта. "Іншая справа, што калі бачыш на месцы пэўныя недакладнасці або нюансы, якія можна выправіць, вядома, адразу выпраўляеш. Але тым не менш аналізуеш, чаму яны не былі выпраўлены да гэтага. Калі бачны якія-небудзь сістэмныя пытанні, то іх узнімаеш на больш высокі ўзровень", - сказаў ён.-0-
Падпісвайцеся на нас у
