Надбаўка даходзіла да 440 працэнтаў. Больш за 100 парушэнняў цэнавага заканадаўства зафіксавалі ў гэтым годзе

10 чэрвеня, Мінск /Кар. БЕЛТА/. За мінулы перыяд 2025 года парушэнні заканадаўства аб цэнах і цэнаўтварэнні ўстаноўлены ў больш як 100 суб'ектаў гаспадарання. Агульная сума штрафаў перасягнула Br250 тыс., паведамілі БЕЛТА ў Міністэрстве антыманапольнага рэгулявання і гандлю.

Так, у Гомельскай вобласці выяўлены факт рэалізацыі ТАА "МВ-опт" агародніны "баршчовага набору" і яблыкаў з надбаўкай 442 працэнты пры дапушчальных заканадаўствам 30 працэнтаў. У выніку неабгрунтаванай дзейнасці арганізацыя атрымала больш як Br50 тыс. выручкі, за што ёй пагражае штраф у памеры да Br110 тыс.

У Мінскай вобласці ПГУП "СІРС" недакладна пазначала даныя ў таварна-транспартнай накладной пры рэалізацыі прадукцыі. У ІП Міхуты Н.А. адсутнічалі дакументы для абгрунтавання рознічных цэн і былі завышаны дапушчальныя гандлёвыя надбаўкі да 55 працэнтаў пры дазволеных 15-30 працэнтаў.

У Брэсцкай вобласці зафіксавана прымяненне індывідуальнай прадпрымальніцай Філіпавай Т.Ю. на безалкагольныя напіткі і ваду гандлёвых надбавак ад 47 працэнтаў да 156 працэнтаў пры абмежаванні не больш за 40 працэнтаў.   

Як рэзюмавалі ў ведамстве, усе парушальнікі прыцягнуты да адміністрацыйнай адказнасці, пастановы эканамічных судоў Мінскай і Брэсцкай абласцей уступілі ў законную сілу.-0-