28 кастрычніка, Мінск /Кар. БЕЛТА/. Начныя замаразкі і не вышэй за 10 градусаў цяпла чакаецца ў Беларусі на бягучым тыдні, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Цяпло пакідае тэрыторыю Беларусі. На гэтым тыдні пад уплывам малаактыўных атмасферных франтоў і паветраных мас, якія паступаюць з паўночных шырот, усталюецца халоднае надвор'е з тэмпературным фонам на 1-3 градусы ніжэйшым за кліматычную норму, месцамі пройдуць дажджы і мокры снег", - адзначылі ў Белгідрамеце.
У аўторак, 29 кастрычніка, малаактыўны атмасферны фронт абумовіць месцамі кароткачасовыя дажджы, удзень па поўначы краіны з мокрым снегам. За фронтам пачне паступаць халоднае паветра з поўначы Скандынавіі, і тэмпературны фон пачне паніжацца. Тэмпература паветра ўначы складзе ад нуля да плюс 6 градусаў, удзень прагназуецца 3-8 градусаў цяпла, толькі па поўдні краіны будзе да плюс 10 градусаў.
У сераду, 30 кастрычніка, прадоўжыць паступаць халоднае паветра з поўначы Еўропы, і пахаладанне ўзмоцніцца. Тэмпература паветра ў начны час складзе ад нуля да мінус 5 градусаў, удзень будзе ад нуля да плюс 5 градусаў, па паўднёвым захадзе краіны - да 7 градусаў цяпла. "Уначы месцамі па краіне пройдуць кароткачасовыя ападкі, у асноўным мокры снег, у асобных раёнах чакаюцца туман, слабы галалёд. Удзень будзе пераважна без ападкаў", - адзначылі сіноптыкі.
У чацвер, 31 кастрычніка, месцамі, пераважна па паўночнай палавіне краіны, пройдуць кароткачасовыя ападкі (мокры снег, дождж). Уначы і раніцай у асобных раёнах туман, слабы галалёд. Тэмпература паветра ўначы - ад мінус 4 да плюс 1 градуса, месцамі тэмпература паветра апусціцца да 6 градусаў марозу, удзень прагназуецца ад 1 да 7 градусаў цяпла.
У пятніцу, 1 лістапада, месцамі, пераважна па паўночна-ўсходняй палавіне рэспублікі, таксама пройдуць кароткачасовыя ападкі ў выглядзе мокрага снегу, дажджу. Уначы і раніцай у асобных раёнах чакаюцца слабыя туман і галалёд. Тэмпература паветра ўначы будзе ад 3 градусаў марозу да 2 градусаў цяпла, пры праясненнях яна панізіцца да мінус 6 градусаў. Удзень чакаецца ад мінус 1 па паўночным усходзе да плюс 7 градусаў па паўднёвым захадзе краіны.-0-
