На што робяць стаўку ў беларускай свінагадоўлі? Падрабязнасці стратэгіі на бліжэйшыя 10 гадоў

Штогод беларусы спажываюць амаль 295 тыс. т свініны. Як расказалі ў Мінсельгасхарчы, асноўны аб'ём гэтага мяса вырабляецца на прамысловых комплексах па вырошчванні і адкорме свіней. Цяпер у краіне налічваецца каля 90 такіх прадпрыемстваў. У рэспубліцы распрацавана стратэгія развіцця ультрасучаснай свінагадоўлі на 2025-2034 гады.

У ліку яе прыярытэтаў абазначаны будаўніцтва 12 новых комплексаў па вырошчванні і адкорме свіней (чатыры з іх - на 100 тыс. галоў), удасканаленне селекцыйна-племянной работы па развядзенні спецыялізаваных мясных і камбінаваных парод свіней на аснове інавацыйных ДНК-метадаў, распрацоўка рацыёнаў кармлення свіней з улікам іх пароды і напрамку прадукцыйнасці (фактычна адраснае кармленне), укараненне сістэмы лічбавага нагляду ў вытворчых памяшканнях, стварэнне буйных аграхолдынгаў, у структуры якіх будуць зямельныя ўгоддзі, камбікормавыя заводы, мясаперапрацоўка, арганізацыі гандлю.

А што будуць рабіць са старымі свінагадоўчымі комплексамі? Як растлумачылі ў міністэрстве, іх стараюцца перапрафіляваць.

"У тых краінах, якія з намі мяжуюць, неспрыяльная сітуацыя па АЧС (афрыканская чума свіней. - Заўвага БЕЛТА). І мы заціснуты ў сябе. Мы стараемся палепшыць біялагічную бяспеку нашых свінагадоўчых комплексаў. Закрываем старыя комплексы - штогод адзін-два ў адпаведнасці з планам. Мы іх не знішчаем, а пераспецыялізуем пад утрыманне птушкі, буйной рагатай жывёлы. Да кожнага аб'екта аблвыканкамы і Мінсельгасхарч падыходзяць індывідуальна. Але залог усяго - гэта будаўніцтва новых комплексаў. Яны больш эфектыўныя, ад іх больш аддачы. І на новых комплексах менш захворванняў, таму што яны камплектуюцца "чыстым" пагалоўем", - расказала Наталля Соніч.-0-

*Праект створаны за кошт сродкаў мэтавага збору на вытворчасць нацыянальнага кантэнту.