21 сакавіка, Мінск /Кар. БЕЛТА/. На конкурс "Інтэрнэт-прэмія ТІБО" пададзена 206 заявак, паведамілі БЕЛТА ў Міністэрстве сувязі і інфарматызацыі.
Прыём заявак на конкурс завяршыўся 20 сакавіка.
У гэтым годзе конкурс праводзіцца па 10 асноўных намінацыях. Больш за ўсё заявак было пададзена ў намінацыі "Органы дзяржаўнага кіравання і ўлады" - 54. У намінацыях "Адукацыя і навука" - 33 заяўкі, "Інфармацыйны рэсурс" - 27, "Карпаратыўныя інтэрнэт-рэсурсы" - 24, "Інтэрнэт-гандаль" - 5, "Турызм і адпачынак" - 8, "Спорт" - 7, "Здароўе і медыцына" - 22, "Для дзяцей і юнацтва" - 10, "Карпаратыўныя акаўнты ў сацыяльных сетках" - 16.
У бягучым годзе журы конкурсу дадаткова мае права вылучыць на саісканне інтэрнэт-прэміі любы беларускі інтэрнэт-рэсурс, які дастойны і заслугоўвае на іх думку ўзнагароды конкурсу. Рашэнне па кожным з вылучаных рэсурсаў прымаецца галасаваннем членаў журы на падагульняючым пасяджэнні.
Арганізатарамі конкурсу з'яўляюцца Міністэрства сувязі і інфарматызацыі, Міністэрства інфармацыі і ЗАТ "Тэхніка і камунікацыі".
Інтэрнэт-прэмія ТІБО праводзіцца ў Беларусі штогод з 2003 года. Асноўныя мэты конкурсу - папулярызацыя лепшых інтэрнэт-рэсурсаў і садзейнічанне развіццю нацыянальнага сегмента глабальнай сеткі Інтэрнэт як асяроддзя для распаўсюджвання тавараў і паслуг, прафесійнай дзейнасці, творчасці, адпачынку, стасункаў. З пачатку правядзення конкурсу ў ім прынялі ўдзел каля 9 тыс. беларускіх інтэрнэт-рэсурсаў.
Узнагароджванне пераможцаў і прызёраў адбудзецца ў дні работы форуму ТІБО (18-21 красавіка, г.Мінск, пр. Пераможцаў, 111а). У цырымоніі ўзнагароджвання традыцыйна прымуць удзел кіраўнікі профільных міністэрстваў і ведамстваў, грамадскіх арганізацый.-0-
