30 лістапада, Мінск /Кар. БЕЛТА/. МУС прыняло неабходныя меры для падтрымання парадку ў краіне і забеспячэння грамадскай бяспекі ў месцах правядзення несанкцыянаваных мерапрыемстваў 29 лістапада. Такая інфармацыя размешчана ў Telegram-канале прэс-сакратара МУС Вольгі Чамаданавай, паведамляе БЕЛТА.
Як адзначылі ў ведамстве, заклікі шэрага Telegram-каналаў да ўдзелу ў незаконных акцыях не знайшлі падтрымкі насельніцтва і шырокага распаўсюджвання ў рэгіёнах рэспублікі, за выключэннем сталіцы. Пратэсная актыўнасць прадаўжае зніжацца.
У розных раёнах Мінска пратэстуючыя збіраліся групамі. Супрацоўнікі міліцыі неаднаразова папярэджвалі аб недапушчальнасці парушаць заканадаўства аб масавых мерапрыемствах і заклікалі захоўваць дарожную бяспеку. У той жа час асобныя грамадзяне ігнаравалі патрабаванні праваахоўнікаў, выходзілі на праезную частку і блакіравалі рух транспарту. Некаторыя вялі сябе агрэсіўна, знаходзіліся ў стане алкагольнага ап'янення. Найбольш актыўныя парушальнікі грамадскага парадку, якія аказалі супраціўленне міліцыянерам, затрымліваліся, у тым ліку з прымяненнем спецсродкаў.
"Па-ранейшаму да ўдзелу ў пратэстах дарослыя далучаюць падлеткаў і выкарыстоўваюць сваіх малалетніх дзяцей як жывы шчыт, не задумваючыся аб іх бяспецы", - расказалі ў МУС.
У Мінскім раёне праваахоўнікі працяглы час праводзілі з пратэстуючымі растлумачальную работу, заклікалі спыніць проціпраўныя дзеянні. Аднак неаднаразовыя законныя патрабаванні грамадзяне прадаўжалі ігнараваць. У прыватнасці, станавіліся ў счэп, груба выказваліся ў адрас супрацоўнікаў унутраных спраў, актыўна супраціўляліся. У выніку праваахоўнікі былі вымушаны прымяніць спецсродкі (некалькі папераджальных выстралаў у паветра святлошумавымі патронамі, слёзатачывы газ).
Усяго ўчора па краіне за парушэнне заканадаўства аб масавых мерапрыемствах і да разгляду ў судзе спраў па адміністрацыйных правапарушэннях у месты ўтрымання затрыманых змешчаны 313 чалавек. Па фактах актыўнага супраціўлення супрацоўнікам органаў унутраных спраў, блакіравання руху праводзяцца праверкі ў рамках крымінальна-працэсуальнага заканадаўства.
За мінулыя суткі зарэгістраваны два выпадкі непраўдзівай занятасці чыгуначных пуцей: з-за накладання металічнага дроту ў Верхнядзвінскім раёне і пашкоджання кабелю трансфарматара ў Буда-Кашалёўскім раёне. У абодвух выпадках затрымкі паяздоў не было. Па гэтых фактах следчыя органы ўзбудзілі крымінальныя справы.
У Мінскім раёне праводзяцца праверкі па фактах падпалу аўтамабільнай шыны на абочыне аўтадарогі Мінск - Віцебск і крадзяжу ў ноч з 28 на 29 лістапада Дзяржаўнага сцяга Беларусі з будынка Лядзішчанскага цэнтра культуры і вольнага часу ў Барысаве.-0-
