23 ліпеня, Мінск /Кар. БЕЛТА/. МУС заклікае выконваць меры бяспекі пры наведванні лесу. Аб гэтым БЕЛТА паведамілі ва УУС Мінскага аблвыканкама.
"Рэдкі аматар збірання ягад і грыбоў, заходзячы ў лес, задумваецца, што можа заблукаць. Вопыт паказвае, што гэта можа адбыцца ў месцах, якія, здавалася б, нядрэнна знаёмыя. Штогод у міліцыю паступаюць трывожныя паведамленні аб тым, што чалавек пайшоў у лес і не вярнуўся. Гэты год не выключэнне. На жаль, бывае, што заблукаўшага выратаваць не ўдаецца. Тое, што ў лесе губляюцца толькі пажылыя грамадзяне і дзеці, не адпавядае рэчаіснасці", - падкрэслілі ва УУС.
У міліцыі нагадваюць: лес - не бяспечнае асяроддзе. "Чалавек, які смела туды ідзе і разлічвае, што з ім нічога не здарыцца, не заўсёды мае рацыю. Толькі ў ліпені давялося рэагаваць на два такія паведамленні. Так, жыхар пасёлка Новапалескі 1963 года нараджэння 14 ліпеня пайшоў з дому ў лес па ягады. Ён да гэтага часу не знойдзены", - расказалі ў ведамстве.
Тым, хто плануе адправіцца ў лес, раяць загадзя разлічваць, што плануемыя некалькі гадзін могуць зацягнуцца. Рэкамендуецца ўзяць з сабой тэлефон з поўнасцю зараджанай батарэяй і грашамі на рахунку, бутэльку вады ёмістасцю не менш як 1,5 л і невялікі запас прадуктаў. Пры наяўнасці хранічных захворванняў, якія патрабуюць рэгулярнага лячэння, трэба абавязкова ўзяць неабходныя лякарствы. Не будуць лішнімі запалкі - іх варта засцерагчы ад вільгаці. Акрамя таго, спатрэбяцца ліхтарык, свісток і компас, прынцып работы якога трэба вывучыць загадзя.
"Калі вы ўсё ж заблукалі, не варта панікаваць. Часцей за ўсё знайсці дарогу назад даволі лёгка, калі не палохацца і не заходзіць яшчэ далей углыб. Трэба пастаянна спыняцца, аглядацца, прыслухоўвацца - аўтадарога, праходзячы поезд або гукі нават невялікага населенага пункта чуваць з вялікай адлегласці, тады можна ісці на гэтыя гукі. Пры магчымасці можна акуратна залезці на высокае дрэва для добрага агляду мясцовасці", - растлумачылі ва УУС.
Як адзначаецца, без арыенціраў чалавек ходзіць па крузе, таму важна звяраць напрамак з рухам сонца. "Калі сарыентавацца не ўдаецца, неабходна спрабаваць тэлефанаваць сваякам, ратавальнікам або ў праваахоўныя органы. У выпадку калі гэтага зрабіць не ўдалося, не трэба бегаць па лесе, адыходзіць далёка ад месца, дзе згубіліся. Лепш проста заставацца на месцы, развесці агонь - дым відаць з вялікай адлегласці. Сваё месцазнаходжанне таксама можна абазначаць стукам палкі па дрэве. Нават з надыходам цемры ўсё роўна лепш заставацца на месцы, інакш высокая рызыка атрымання траўмы", - рэкамендуюць спецыялісты.-0-
