Муравейка: Беларусь не разглядае ніводную дзяржаву як праціўніка, ні на кога нападаць не збіраецца 

21 снежня, Мінск /Кар. БЕЛТА/. Беларусь не разглядае ніводную дзяржаву як праціўніка, ні на кога нападаць не збіраецца. Аб гэтым у эфіры тэлеканала СТБ заявіў начальнік Генеральнага штаба Узброеных Сіл - першы намеснік міністра абароны Беларусі Павел Муравейка, паведамляе БЕЛТА.

Павел Муравейка падкрэсліў, што Беларусь проста забяспечвае сваю бяспеку. "Гэта ўжо мільён разоў было сказана на ўсіх узроўнях. Мы ні на кога нападаць не збіраемся і ніводную дзяржаву не разглядаем як праціўніка. Мы поўнасцю гатовы жыць у міры, забяспечваючы ўзаемную бяспеку з улікам нашых інтарэсаў і строгага захавання нашай бяспекі", - сказаў ён.

Паводле яго слоў, у наступным годзе ваенная бяспека ў рэгіёне будзе залежаць ад развіцця падзей і ходу ваеннага канфлікту ва Украіне. "Па-першае, ад гэтага. Па-другое, ад рашэнняў, якія прымуць Злучаныя Штаты і Расійская Федэрацыя, абмяркоўваючы выкананне мірнага дагавора. І ёсць рэальная верагоднасць, што напружанасць і эскалацыя ўсё ж такі знізяцца, - адзначыў першы намеснік міністра. - Перспектыва ўсталявання міру ва Украіне, вядома, існуе. Над гэтым працуе ўся сусветная супольнасць. Разважлівасць возьме верх над мілітарысцкімі амбіцыямі, мір будзе ўсталяваны ў гэтай краіне, і эскалацыя напружанасці знізіцца ва ўсім рэгіёне".-0-